د سیاسي چارو یو شمېر شنونکي وايي، د مسکو په کنفرانس کې له افغانستان سره په بېلابېلو برخو کې ژمنې وشوې او په خبره یې تر ډېره ګټور وه.
دوی وايي، دغه کنفرانس افغانان هیله من کړي، چې د افغانستان کړکېچ په حل کې به مرسته وکړي.
دوی زیاتوي، دغه کنفرانس د نړیوال مشروعیت لپاره مهم رول درلود او له افغانستان سره یې د ګډونوالو ژمنې د نړیوال مشروعیت لپاره هیلې زیاتې کړي دي .
د شنونکو په باور روسیه او چین چې د سیمې دوه زبرځواک هېوادونه دي، که له افغانستان سره کړې ژمنې عملي کړي، نړیوال به وهڅوي چې د طالبانو پر مشرۍ نوی حکومت پر رسمیت وپيژني.
شنونکی عزیز معارج وايي:«روسیه او چین په سیمه کې ستر زبر ځواک هېوادونه دي او همداراز د ملګرو ملتونو د امنیت شورا دایمي غړي هم دي. له بل لوري د غرب او ناټو حریفان هم بلل کېږي، نو بنآ هغه ژمنې چې له طالبانو سره یې کړي، چې مرستې به ورسره کوي دوی به پر رسمیت پېژني او کنګل شوې پیسې به یې بېرته خلاصوي، دا ټول زیات مثبت تاثرات لري او نړیوال دې ته هڅوي چې افغانستان پر رسمیت وپیژني.»
د مسکو کنفرانس د سیمې پر کچه د افغانستان لپاره یو ښه دیپلوماتیک سټیج و او باید ترې ګټه واخېستل شي او نړیوالو ته وښودل شي، چې د افغانستان له نوي نظام سره ټول افغانان ولاړ دي.
شنونکي هاتف مختار وايي:« دا د افغانستان د اسلامي امارت لپاره یو ډېر ښه سټېج دی، چې باید اسلامي امارت په کې د افغانستان د خلکو ښه استازیتوب وکړي. له طالبانو نه مو غوښتنه دا ده، چې باید د افغانستان پخوانیو دیپلوماتانو له دوی سره په دغه کنفرانس کې ګډون درلودی، چې نړیوال ته یې ښودلې وای چې د افغانستان ټول ملت له دوی سره دی، نو دغه کنفرانس به د افغانستان د اسلامي امارت د پېژندلو لپاره یو ګټور او مفید ګام وي.»
