د کرنې اوبولګولو او مالدارۍ وزارت د نیالګیو کېنولو پسرلنی ملي کمپاین د «نن نیالګی د سبا هوساینه» ترشعار لاندې پیل کړ.
د دې وزارت چارواکي وايي، د پلان له مخې به سږ کال په ټول هېواد کې ۱۶ میلیونه نوي نیالګي پر زرګونه هکټاره ځمکو کېنول شي.
د دې وزارت د طبیعي سرچینو ریاست وايي، د نیالګیو کېنولو لپاره ځانګړی لس کلن پلان جوړ شوی چې په کې د ۱۶۰ میلیونه اصله نیالګیو کېنول شامل دي.
د کرنې، اوبو لګولو او مالدارۍ وزارت د طبیعي سرچینو رئیس عبدالاحد خلیل وايي: « سږ کال د ټول هېواد په کچه ۱۶ میلیونه نیالګي د وېش لپاره لرو. له ۱۴۰۱ کال څخه نیولې تر راتلونکو لسو کلونو پورې مو ستراتیژيک پلان جوړ کړی او ټاکل شوې چې ۱۶۰ میلیونه نیالګي ووېشل شي او پر ۲۰۰ زره هکټاره ځمکو باندې کېنول شي.»
چارواکي د اقلیمي بدلون د مخنیوي لپاره د نیالګیو کېنول مهم ګڼي او زیاتوي، د ځنګلونو پیاوړتیا نه یوازې طبیعي ښکلا رامنځته کوي بلکې د اوبو ساتنې او د سېلابونو په مخینوي کې هم اغېزناک رول لري.
د کرنې، اوبو لګولو او مالدارۍ وزارت مالي او اداري معین آغاجان حاجي اسلم وايي: « د ځنګلونو شتون د هوا ککړتیا د کمولو او د اقلیم د بدلون مخنیوي لپاره ډېر مهم دی. د ځنګلونو بل اهمیت د اوبو د دوران تنظیمول دي؛ ځنګلونه د باران اوبه جذبوي او د سېلابونو مخه نیسي.»
په همدې حال کې، د کرنې، اوبولګولو او مالدارۍ وزارت چارواکي د چرګانو د غوښې په برخه کې هم د افغانستان د ځان بسیاینې خبر ورکوي او زیاتوي، افغانستان به په نږدې ورځو کې به په ګڼ شمیر نورو برخو کې هم پرځان بسیا شي.
د دې وزارت د اوبو لګونې او طبیعي سرچینو معین بیا وايي، هڅه کېږي ورکړل شوې بودیجه د مالدارۍ، اوبو لګونې او کرنې په برخو کې په اغېزناکه بڼه ولګول شي.
د کرنې، اوبو لګولو او مالدارۍ وزارت د اوبو لګولو او طبیعي سرچینو معین بازمحمد فیضان وايي: « د مالدارۍ او آبیارۍ په برخو کې مو هڅه کړې چې خپله انکشافي بودیجه په ځای او اغېزناکه ولګول شي.»
د کرنې، اوبو لګولو او مالدارۍ وزارت د کرنې او مالدارۍ معین مولوي صدراعظم عثماني وايي:« موږ الحمدالله د چرګانو د غوښو په تولید کې خود کفايي ته رسېدلي یو. همدارنګه په ځینو نورو برخو کې هم خودکفايي ته ډېر نږدې شوي یو.»
د کرنې وزارت چارواکي په خلکو هم غږ کوي چې د نیالګیو کېنولو په کمپاین کې ونډه واخلي او دغه راز د کېنول شویو نیالګیو اوبه خور او ساتنې ته جدي پاملرنه وکړي.
