په ننګرهار کې د وچو مېوو یو شمېر کاروباریان او سواګر وايي، د مېوو د پروسېس او بسته بندۍ لپاره د مناسب ځای او وسایلو نه شتوالي له امله، ګڼو ستونزو سره مخ دي.
دوی زیاتوي، سرپرست حکومت دې د نورو ولایتونو په څېر په ننګرهار کې هم د وچو مېوو د پروسېس او بسته بندۍ لپاره یو مناسب مارکېټ جوړ او د سوداګرو په واک کې دې ورکړي.
د وچو مېوو کاروباري محمد یار وايي: « موږ دلته د وچې مېوې لپاره ځانګړی مارکېټ نه لرو. له حکومت غوښتنه کوو چې موږ ته مارکېټ او ځانګړی ځای راکړي. موږ غواړو خپلې مېوې همدلته پروسېس او بسته بندي کړو او بیا یې نورو هېوادونو ته واستوو.»
د وچو مېوو یو بل کاروباري محمد الله وايي:« موږ له حکومت غوښتنه کوو چې له نړیوالو معیارونو سره سم یوه منډوي موږ ته جوړه کړي. زموږ اوسنی ځای ډېر بد وضعیت کې دی، نه په کې اوبه شته، نه تشنابونه او نه هم مسجد. له امارت غوښتنه کوو چې ژر تر ژره د یوه مارکېټ غمه وخوري.»
دوی زياتوي، سره له دې چې د افغانستان وچه مېوه د ښه کیفیت لرونکې ده، خو له بهره واردېدونکو وچو مېوو سره ځکه سیالي نه شي کولی چې دلته په معیاري ډول د پروسېس کولو امکانات نه شته.
دوی ټینګار کوي چې له بهر پر واردېدونکو وچو مېوو دې تعرفه لوړه شي، ترڅو د افغانستان خپله وچه مېوه بازار پیدا کړي.
د وچې مېوې سوداګر خلیل الرحمن وايي: « باید د چین پر توکو داسې مالیه وضع شي چې له امله یې زموږ توکي خرڅ شي. هغوی خپل پروسېس کړي توکي او مالونه دلته راوړي او دا سبب کېږي چې زموږ نا پروسېس شوي توکي څوک ونه پېري. تېرکال زموږ هر سوداګر له یوه تر دوه میلیونو افغانیو زیانونه وکړل.»
د وچې مېوې یو بل سوداګر حضرت عمر وايي: « زموږ یوه بله غوښتنه دا ده چې اوس مهال یوازې چین هېواد سره قراردادونه لرو، باید دغه قراردادونه له نورو هېوادونو سره هم وشي. همدارنګه د مارکېټ غوښتنه کوو، ترڅو له کلیو او ولسوالیو راتلونکې مېوې دلته پروسېس او بیا صادرې کړو. اوس مهال زموږ مېوې د نورو هېوادونو په نامه صادرېږي، خو موږ غواړو په خپل نوم یې صادرې کړو.»
ځايي مسوولین بيا د دوی ستونزو او غوښتنو ته په پام وايي، هڅه کوي چې د وچو مېوو کاروباریانو او سوداګرو ستونزو ته رسېدنه وکړي او د کاروبار د پرمختګ لپاره يې نورې اسانتیاوې هم ورته برابرې کړي.
د دوی په خبره، اوس مهال د صنعت او سوداګرۍ وزارت داخلي تولیداتو ته د بازار موندنې او د سوداګرو د ملاتړ په موخه پر یو شمېر عوضي توکو تعرفه هم لوړه کړې ده.
د ننګرهار صنعت او سوداګرۍ ریاست د سوداګریزو چارو آمر شاکرالله ستانکزی وايي: « موږ هڅه کوو د دې ځای محصولات نور هم ستندرد او معیاري شي او بیا نورو هېوادونو ته صادر شي. موږ په هغو مشابه مېوو مالیه لوړه کړې چې له نورو هېوادونو راځي، ترڅو داخلي صنایع تقویه او ښه فروشات ولري.»
ننګرهار، لغمان، کونړ او نورستان هغه ولایتونه دي چې د وچو مېوو ډېر حاصلات ترې ترلاسه کېږي. د دې ولایتونو د مېوې کاروباریان او سوداګر ټینګار کوي چې همدلته ننګرهار کې ورته د پروسېس او بسته بندۍ لپاره اسانتیاوې برابرې شي.
