د مصر په پلازمېنه قاهره کې د افغانستان سفارت په هڅو د یوشمېر افريقايي هېوادونو له بندخونو ۱۷ تنه افغان بندیان آزاد او کابل ته ولېږدول شول.
د بهرنیو چارو وزارت د ویاند مرستیال ضیا احمد تکل وايي، دغه افغانان په تېرو درېیو میاشتو کې د مصر په ګډون په مراکش، لېبیا، سوډان او موریټانیا هېوادونو کې د بېلابېلو دلایلو له امله بندیان وو.
تکل زیاتوي: « د مصر په پلازمېنه قاهره کې د افغانستان اسلامي امارت د لوی سفارت په هڅو په تېرو درېیو میاشتو کې د مصر په ګډون له یو شمېر افریقایي هېوادونو، لکه مراکش، لیبیا، سوډان او موریتانیا ۱۷ افغانان چې دغو هېوادونو کې د بېلابېلو دلایلو له امله بندیان وو، له بند آزاد او د آریانا افغان هوایي شرکت له لارې هېواد ته راولېږدول شول.»
تکل وايي، سرپرست حکومت به په راتلونکي کې هم له هېواد بهر د مېشتو افغان اتباعو د ساتنې او د هغوی د حقونو د خونديتوب لپاره هڅې جاري ساتي.
هغه زیاتوي: « د یادونې وړ ده چې د بندویانو دغه پروسه په قاهره کې د افغانستان لوی سفارت او د مذکوره هېوادونو په همغږۍ ترسره شوې. همداراز یاد سفارت هڅه کوي چې په راتلونکي کې هم د خپلو اتباعو د ساتنې او د هغوی د حقونو د خوندي کولو لپاره خپلې هلې ځلې جاري وساتي.»
په ورته وخت کې د نظر خاوندان د سرپرست حکومت دغه اقدام ستايي او غوښتنه کوي چې باید له نورو هېوادونو سره هم د کډوالو د ستونزو هوارولو په برخه کې ورته هڅې وشي.
د سیاسي چارو شنونکی محمد زلمی افغانیار وايي: « دا چې په مصر کې د افغانستان د سفارت سرپرست بریالی شوی د هغو ۱۷ تنو افغانانو د خوشې کولو زمینه برابره کړي چې هلته بندیان وو، دا یو مثبت ګام دی. همدارنګه دا چې له الجزایر، لیبیا او سوډان سره هم د ډېپلوماټیکو هڅو او خبرو اترو له لارې هلته یو شمېر بندي افغانان راخوشې شوي، دا د بهرنیو چارو وزارت فعاله ډیپلوماسي څرګندوي چې د خپلو وګړو د خوندیتوب لپاره خپل مکلفیت اداء کوي. هر هغه حاکمیت چې د ملي ګټو او د خپلو وګړو د حق ورکولو پر اساس پلان او پالیسي ولري، ښکاره خبره ده چې فاصلې له منځه ځي.»
د سیاسي چارو شنونکی خلیل احمد نادم وايي: « دا چې افغان وګړي د نړۍ په هر ځای کې بندیان وي او سفارتونه هڅه کوي راخوشې یې کړي، دا د افغانانو لپاره یو مثبت ګام دی، ځکه زموږ خلک هرځای مهاجر دي او ګڼې ستونزې لري؛ خو دغه هڅې تر هغه وخت ډېرې اغېزناکې نه شي تمامېدای چې خپله افغانستان پر رسمیت نه وي پېژندل شوی، له نړۍ سره ګډ ژوند پیل نه کړي، په ملګرو ملتونو کې خپله څوکۍ ونه لري، په اروپايي ټولنه کې استازی ونه لري، تر هغو به دغه مشکلات له موږ سره وي.»
په دې وروستیو میاشتو کې په ګاونډيو هېوادونو او په ځانګړې توګه پاکستان او ایران کې د افغان کډوالو د بندي کولو او ځورونې پېښې زياتې شوې چې دغه کړنې په کور دننه او پر نړیوالو کچه له غندې سره مخ دي.
