د افغانستان سولې لپاره د امریکا پخواني ځانګړي استازي زلمي خلیلزاد خبرداری ورکړی چې پاکستان د افغانستان د بې ثباته کولو لپاره نوې لار غوره کړې ده.
خلیلزاد پر خپلې اېکس پاڼې ليکلي، د پاکستان استخباراتي اداره غواړي د افغانستان مخکېني حکومت د ځينو چارواکو په وسيله په افغانستان کې ګډوډي او بې ثباتي رامنځته کړي.
هغه زیاته کړې:« داسې راپورونه ورکول شوي چې د پاکستان استخباراتي ادارې غړیو په ترکیه کې د افغانستان د مخکېني حکومت له یو شمېر چارواکو سره لیدلي. که دا رښتيا وي، نو پاکستان غواړي له دغو پخوانيو چارواکو تبلغاتي ګټه واخلي، ترڅو په افغانستان کې تاوتریخوالی او بې ثباتي زیاته کړي. خو دغه افغان مشران باید د آی.اېس.آی د لوبو وسیله نه شي.»
د سیاسي چارو کارپوهان بیا وايي، پاکستان تل د افغانستان له کورنیو او نړیوالو ستونزو ګټه پورته کړې او اوس غواړي افغانستان یوځل بیا د بې ثباتۍ کندې ته واچوي.
دوی زیاتوي، د دغو تازه دسیسو مخنیوی د ولس پر ملاتړ او د هغو سیاسي ګوندونو او څېرو په راخپلولو سره کېدای شي چې اوس له هېواده د باندې اوسېږي.
د پوهنتون استاد فیض محمد ځلاند وايي: « پاکستان همیشه د افغانستان له کورنیو او نړیوالو ستونزو د ځان پر ګټه استفاده کړې. پاکستان د خپل دوه رنګه او منافقانه سیاست له مخې یو بې نظمه او کمزوری افغانستان غواړي. له همدې امله، موږ افغانانو ته په کار ده چې لومړی خپله کورنۍ دنده ترسره کړو، ځانونه پياوړي او کورنی مشروعیت ترلاسه کړو، ولس له ځان سره مل کړو او ټولې سیاسي څېرې، ګوندونه چې د افغانستان په بیارغونه، پرمختګ او سوکالۍ کې اغېز لري، راخپل کړو او پرېنږدو چې زموږ دوښمنان که دا پاکستان وي یا نور ګاونډیان، له هغوی زموږ په خلاف ګټه پورته کړي. که چېرې موږ دا کار نه کوو، له بده مرغه د تېرو څلورو لسیزو تاریخ به پر موږ تکرارېږي. هرکله چې په تېرو څلورو لسیزو کې په کابل کې حکومت جوړ شوی، پاکستان د هغو مخالفین پياوړي کړي او د ننګولو کوښښ یې کړی.»
ځینې نور بیا وايي، پاکستان د پخوا په څېر یوځل بیا په افغانستان کې د سولې او امنیت ضد سیاست غوره کړی، خو دا ځل سیمه ییز او نړیوال ملاتړ نه لري او یوازې په خپلو پخوانیو لاس پوڅو یې اتکا کړې چې هدف ته به یې ونه رسوي.
د سیاسي چارو شنونکی حکمت الله حکمت وايي: « پاکستان یوځل بیا په افغانستان کې د سولې او امنیت ضد سیاست د تېر په څېر له ترهګرۍ پر ملاتړ، د خپلو پخوانیو جاسوسانو د بیا ګومارلو او په افغانستان کې د خپل یوه بل لاس پوڅي حاکمیت رامنځته کولو هڅه شروع کړې. پاکستان دا ځل نړیوال ملاتړ نه لري، سیمه ییز ملاتړ نه لري او زه باور لرم چې پاکستان به په دې لوبه کې ناکام شي او افغانستان به وکولی شي چې خپل ثبات، امنیت او د قومونو ترمنځ ورورګلوي وساتي. د دې کار لپاره په کار ده چې اوسنی نظام د افغانستان د خلکو مشروع غوښتنې ومني او له افغانانو سره په جرګه او مشوره باندې د شرعي احکامو په چوکاټ کې داسې سیاست ته مخه کړي چې افغانانو یې په تېرو درېیو کالو کې غوښتنه کړې.»
له تېرو پنځو لسیزو راهیسې پاکستان د افغانستان په داخلي چارو کې د مداخلې له لارې په کابل کې د واکمنو نظامونو مخالفت کړی.
د سیاسي چارو شنونکو په اند، اوس هم اسلام اباد په افغانستان کې له رامنځته شوي مرکزي نظام سره مخالف دی او نه غواړي افغانستان ځواکمن خپلواک مرکزي نظام ولري.
