اسلامي امارت د پاکستان دفاع وزیر هغه څرګندونې په توندو او سختو ټکو وغندلې چې سلطان محمود غزنوي یې لوټمار او غل بللی و.
د اسلامي امارت مرستیال ویاند حمدالله فطرت د پاکستانی دفاع وزیر خواجه آصف بې مسولیته او ناخبر شخص بللی.
فطرت پر خپله اېکس پاڼه سلطان محمود غزنوي د مسلمه امت ویاړ بللی او ویلي یې دي، هغه هند ته د مسلمانانو د آزادۍ لپاره تللی و.
د پاکستان دفاع وزیر په یوې ټلویزیوني مرکه کې د غزنوي سلطان محمود په اړه ویلي و چې غزنوي د غله په څېر په هند چې پاکستان یې هغه وخت یوه برخه وه، حملې کولې او له شتمنيو سره به بېرته راګرځېده.
د اسلامي امارت مرستیال ویاند حمدالله فطرت وايي: « دا چې د پاکستان د دفاع وزیر پر کچه اشخاص دومره له حقایقو ناخبره وي، د تاسف ځای دی. یو پاکستانی مسوول په داسې حال کې د سلطان محمود غزنوي په اړه ګستاخانه څرګندونې کوي چې د همدې هېواد په دفاعي میزاییلو باندې د محمود غزنوي نوم اېښودل شوی.»
د سیاسي چارو څارونکي بیا وایي، پاکستان هڅه کوي د افغانستان او هند ترمنځ د سیاسي تاریخ له مخې اړېکې کړکېچنې او له دې لارې له نوي ډهلي سره په خپله اړیکې ورغوي.
د دوی په خبره، پاکستان تل د افغانستان پخواني سیاسي تاریخ له مخې هڅه کړې چې د هند او افغانستان ترمنځ اړیکې ترینګلې او بې باوره کړي.
د سیاسي چارو شنونکی شهسوار سنګروال وايي: « زه فکر کوم دوی خپلې سیاسي موخې لري او د دوی موخې څرګندې دي. په دې وروستیو کې د افغانستان او هند ترمنځ اړیکې خوږې دي او دوی قصداً دغسې یوې موضوع ته لمن وهي او غواړي هغه وروستی سیاسي باور چې د دواړو هېوادونو ترمنځ پیدا شوی، هغه ته زیان ورسوي.»
د پوځي چارو شنونکي بیا د پاکستان دفاع وزیر د څرګندونو په غبرګون کې وایي، د پاکستان توغندي تر ډېره د افغانستان د ولایتونو یا تاریخي شخصیتونو لکه ابدالي، غوري او غزنوي په نومونو نومول شوي دي.
د پوځي چارو شنونکی اختر محمد راسخ وايي: «زموږ د نفاق او بدبختیو اساسي کړۍ همدغه پاکستان دی چې هم مو تحقیروي، هم توهینوي، هم مو وژني او هم مو په سیمه کې په وطن کې جګړه کوي او هم یې زموږ دار او ندار چور کړی او چوروي یې.»
د پاکستان د دفاع وزیر په دغه ټلویزیوني مرکه کې دا هم ویلي چې د محمود غزنوي د اتل په توګه معرفي کول سم نه دي.
خواجه آصف زیاته کړې: « هغه دلته (هند) ته د غله په څېر راتلو او مالونه یې لوټ کول. زموږ په تاریخ کې هغه ته د یوه اتل په سترګه کتل کېږي چې دغه څه ماته د منلو وړ نه دي.»
سلطان محمود غزنوي د ۳۹۲ـ ۴۱۶ هجري قمري کلونو ترمنځ څو ځله د هند په لور تللی دی.
د پاکستان د پېژندل شوي سیاسي چارواکي په توګه د نوموړي څرګندونې د پاکستان په ښوونیزو تاریخي کتابونو کې د محمود غزنوي په اړه له لیکلو سره په ټکر کې دي.
د دې هېواد په ښوونیزو کتابونو کې محمود غزنوي د یوې مثبتې او اتلې څېرې په توګه معرفي شوی دی.
د پاکستان لنډ واټن ویشتونکي بالسټیک توغندي په ګډون یو شمېر مهمې پاکستاني وسلې هم د غزنوي په نوم یادېږي.
