د کار او ټولنیزو چارو وزارت د کابل د څرخي پله د حرفوي او مسلکي زده کړو مرکز ته په نشه يي توکو له اعتیاد ۵۰۰ تنه رغېدلي کسان جذب کړل.
دغه وزارت چارواکي وايي، د زده کړو په څلورمه دوره کې به ياد شمېر کسان د شپږو میاشتو په موده کې د خیاطۍ، برېښنا غوځونې، د کور وسایلو د ترمیم او یو شمېر نورو برخو لپاره وروزل شي.
دوی زیاتوي، په تېرو درېیو کلونو کې له اعتیاد رغېدلو۴ زره کسانو ته په بېلابېلو برخو کې د فني او حرفوي زده کړو زمینه برابره کړې ده.
د کار او ټولنیزو چارو وزارت د کار معين مولوي ذاهد حنفي وايي: « لکه نن چې د ۵۰۰ تنو هغو معتادانو چې درملنه یې شوې او اوس یې موږ د حرفې او زده کړو لپاره، د کار او کسب لپاره خپله افتتاحیه غونډه راغوښتې او دوی ته دغه افتتاحیه کوو. همدارنګه به موږ انشاالله په نورو ولایتونو او د افغانستان په نورو زونونو کې کوو.»
چارواکي وايي، په هېواد کې تر ۵۰ ډېر یتیم خونې شته چې ډېری هغه یې خصوصي دي او شاوخوا ۸ زره ماشومان په کې روزل کېږي.
د دوی په خبره، سرپرست حکومت هوډ لري چې په ټول هېواد کې پر نشه يي توکو روږدي کسان راټول او د درملنې ترڅنګ ورته د حرفوي زده کړو زمينه هم برابره کړي.
د کار او ټولنېزو چارو وزارت ویاند سیمع الله ابراهیمي وايي: « هغه کسان چې له دې مخکې د فني او حرفوي زده کړو ځانګړي دغه له اعتیاد څخه رغېدلي ځوانان تقریبا ً څلور زره په شاوخوا کې هېوادوال چې د کابل، کندهار، هرات، پکتیا او پکتیکا د فني او حرفوي زده کړو له مرکزونو فارغ شوې دي او اوس عملا ً د کار په بازار کې د کار څښتنان دي.»
د کار او ټولنیزو چارو وزارت د کار معين په دې اړه وايي: «موږ دا هوډ لرو چې همدا ډول مرکزونه لکه څنګه چې دلته د امېد کمپ دی، په هر زون کې خلاص کړو. هغه که پکتیا ده، که ننګرهار دی، که کندهار دی، که مزارشریف دی او که هرات دی، انشاالله د دوی لپاره به دغه مرکزونه خلاص کړو.»
د فني او حرفوي زده کړو ګډونوال چې تازه له اعتياد رغېدلي وایي، د حرفوي زده کړو فرصت له ترلاسه کولو وړاندې په همدې مرکز کې يې د څلورو میاشتو لپاره له اعتياده د رغېدنې درملنه هم شوې.
دوی له سرپرست حکومته غواړي چې تر روزنې وروسته دې ورته د کار کولو زمینه هم برابره کړي.
د حرفوي زده کړو یو تن ګډونوال محمد الهام وايي: « نږدې ۹ کاله کېږي چې په دې عمل اخته شوی یم، علت یې بېکاري او بدبختي ده چې په دې عمل اخته شوم. شاوخوا درې میاشتې کېږي چې دلته یم او د خیاطۍ برخه مې ځان ته انتخاب کړې او ډېر خوشاله یم چې ورغېدم.»
د حرفوي زده کړو یو بل ګډونوال احمد وارث وايي: « ۱۱کاله مې ښوونځی لوستی او سواد لرم. اوس غواړم یو کسب زده کړم. دلته د ودانیو د برېښنا غځونې په برخه کې یم او غواړم برېښنا غځول زده کړم. زه اوس له اعتیاد رغېدلی یم او په هرڅه پوهېږم.»
د کار او ټولنیزو چارو وزارت د مالوماتو له مخې، دا مهال په ټول هېواد کې د حرفوي او مسلکي زده کړو۵۲ روزنیز مرکزونه شته چې په کې له نارینه وو سربېره ښځې هم حرفوي او مسلکي زده کړې ترلاسه کوي.
په دغو مرکزونو کې هر کال د ښځو په ګډون ۲۰ زره کسانو ته مسلکي او حرفوي زده کړې ورکول کېږي.
