د افغانستان علومو اکاډمۍ په نوښت «د اسلامي نظام په ټینګښت کې د رسنیو رول» تر سرلیک لاندې علمي سیمینار جوړ شو.
په دې سیمینار کې د اطلاعاتو او فرهنګ وزارت د خپرونو معین وویل، اسلامي امارت هېڅ کله هم نه غواړي چې رسنۍ وتړل شي او یا یې هم محدودې وساتي.
حیات الله مهاجر فراهي زیاتوي، سرپرست حکومت له رسنیو سره تفاهم کړی خو اړینه ده چې رسنۍ هم په خپلو خپرونو کې اسلامي ارزښتونه، ملي ګټې او افغاني فرهنګ رعایت کړي.
مهاجر په دې اړه وايي: « اسلامي امارت هېڅکله دا نه غواړي چې رسنۍ وتړل شي یا محدودې شي. موږ له رسنیو سره د تقابل پرځای د تعامل لاره غوره کړې، خو دری ټکي باید په پام کې ونیسو؛ اسلامي ارزښتونه، د هېواد علیا ګټې، زموږ افغاني دود او فرهنګ. په دغو درېیو ټکو کې دننه رسنۍ فعالیت کولی شي.»
په ورته وخت کې د علومو اکاډمۍ رئیس په دې سیمینار کې مولوي فریدالدین محمود وايي، رسنۍ د اسلامي نظام د ټینګښت په برخه کې هم ګټورې تمامیدای شي او هم کولی شي نظام ته زیان ورسوي.
مولوي فریدالدین محمود زیاتوي، که رسنۍ په واقعي توګه خپل رول اداء کړي، ګټورې تمامېدای شي.
هغه زیاتوي: « رسنۍ خو دا موجوده آلې دي چې هم ګټورې کېدای شي او هم مضرې. رسنۍ هم د اسلامي نظام د ټینګښت او هم د نظام د سستۍ او په غلط مسیر برابرولو سبب هم کېدای شي.»
د علومو اکاډمۍ رییس د خپلو خبرو په بله برخه کې وايي، رسنیو کې نصیحتونه ورته کېږي او د معاصر تاریخ په اوږدو کې یې ښه رول نه دی لوبولی او داسې رسنۍ د اسلامي نظام په ټینګښت کې هېڅ ګټه نه لري.
د علومو اکاډمۍ رییس په دې اړه وايي:« دا رسنۍ موږ ته سپارښتنې کوي، دا رسنۍ د اسلامي نظام په استحکام کې هېڅ رول هم نه لري.»
بله خوا، د بهرنیوچارو وزارت سیاسي معین د نظامونو په ټینګښت کې د رسنیو رول مهم ګڼي او زیاتوي، باید پر افغاني رسنیو باور وشي او کار کوونکو ته یې د مجاهد په سترګه وکتل شي.
شېرمحمد عباس ستانکزی وايي، اسلامي امارت باید د هغې تبلیغاتي جګړې پر وړاندې له داخلي رسنیو ملاتړ وکړي چې له بهره د افغانستان حکومت پر وړاندې روانه ده.
ستانکزی زیاتوي: «اعتماد پرې وکړئ، دا زموږ خپله میډیا ده. دا ټلویزیونونه چې همدا اوس زموږ مخې ته ولاړ دي، دا د همدې ملک بچیان او د همدې هېواد خلک دي. دوی د همدې لپاره پیسې مصرفوي چې خپل هېواد ته کار وکړي. نو، دوی ته باید د وطن پرستو افغانانو په سترګه وکتل شي، دوی ته د مجاهدینو په سترګه وګورئ. دا هم زموږ مجاهدین دي او د میډیا په برخه کې جهاد کوي. بنا ً، له دوی سره همکار شئ، پر دوی ډېر انتقادونه او قیودات هېڅ ګټه نه لري، پرته له دې چې تاوان ورورسوي. نو له حکومت او اسلامي امارت څخه زما خواهش دا دی چې زموږ میډیا تقویه کړي، شاته یې ودرېږي او په وړو وړو جزئیاتو مشکل ورته جوړ نه کړي او اجازه ورکړي چې د نړۍ له میډیا سره خپلې مبارزې ته ادامه ورکړي. دا کار هغه وخت کېدای شي چې د اسلامي امارت او میډیا ترمنځ کې واټن ختم شي.»
د بهرنیو چارو وزارت دغه چارواکي د خپلو خبرو په دوام دا هم وویل، هغه کسان چې په رسنیو کې پر سرپرست حکومت نیوکې کوي، د نظام د مخالفینو مانا نه لري بلکې باید ورسره حوصله وشي.
ستانکزی زیاتوي: « که چېرې یوې رسنۍ ته یو څوک راځي او په یوه موضوع باندې خبرې کوي، په ګردي مېز کې برخه اخلي یا تبصره کوي او د حکومت پر ځینو مسایلو نیوکه کوي، له دې سره باید حوصله وشي. داسې نه ده چې کوم څوک د یوې موضوع په اړه خپل نظر ووايي، هغه مجرم دی؛ ځکه چې نظریات مختلف دي او ټول افغانستان په یوه نظر نه شي کېدای.»
په دې سیمینار کې د رسنیو د رول په تړاو د ریاست الوزرا پیغام هم ولوستل شو چې په کې د رسنیو رول مهم یاد شوی دی.
د اسلامي امارت د ویاند مرستیال حمدالله فطرت وايي: « رسنۍ په اوسني عصر کې د خبر رسولو، ابلاغ، عامه پوهاوي او دعوت تر ټولو مهممه وسیله ګڼل کېږي. رسنۍ چې د خپل ځانګړي اهمیت له امله د حکومت یوه قوه ګڼل کېږي، نه یوازې په ورځنیو پېښو د خلکو خبرولو له اړخه بلکې د اذهانو د تنویر، اسلامي دعوت، تعلیم، فرهنګي مبارزې، د خلکو د معلوماتي کچې لوړولو او د دوښمن د تبلیغاتي او رواني جنګ څخه د ولس د ژغورنې له اړخه هم اهمیت لري.»
په سیمینار کې د اسلامي نظام په ټینګښت کې د رسنینو رول په تړاو د ګډونوالو له لوري بېلا بېلې مقالې هم ولوستل شوې او په ټولو برخو کې یې د رسنیو واقعي رول مهم یاد کړ.
رسنۍ د حکومتونو د بدلولو په برخه کې درېیمې او څلورمې قوې په توګه یادې شوې او همدا راز ویناوالو زیاته کړه چې رسنۍ د حکومتونو او ولس ترمنځ د ارتباطي پل حیثیت لري.
