روان کال په کابل او ولايتونو کې پر یو شمېر داسې امنيتي پېښو سربېره چې مسوولیت یې داعش ډلې منلی، د اسلامي امارت یو شمېر جګ پوړي چارواکي او د رهبرۍ غړي بيا هم په افغانستان کې د داعش فزيکي حضور صفر بولي.
انس حقاني له شمشاد تلویزیون سره په ځانګړې مرکه کې وایي، داعش په افغانستان کې د امريکا د حضور پرمهال تحرکات پيل کړي وو، خو اوس دا ډله ماته شوې ده.
د اسلامي امارت د رهبرۍ غړی انس حقاني زیاتوي: « دوی د امریکایانو په وجود کې دلته جغرافیه نیولې وه، په ننګرهار او یو شمېر نورو ځایونو کې موجود وو، خو اسلامي امارت د امریکایانو په وجود کې او داسې مهال چې امریکایانو به زموږ ملګري ویشتل، له دوی یې هغه جغرافیه هم ونیوله ویې ځپل او بیا اوس له دوی سره هېڅ جغرافیه نه شته. اوس اکثریت له بهره خلک واردېږي او دلته بریدونه کوي.»
د سیاسی چارو شنونکي اندېښنه ښيي، که څه هم په افغانستان کې د داعش حضور د صفر کېدو ادعا کېږي، خو بیا هم دا ډله څنګه کولی شي په پېچلو بریدونو لاس پورې کړي؟
د اسلامي امارت مخکښ غړی انس حقاني په دې اړه وايي، داعش غواړي په ورته بريدونو سره افغانستان کې خپل بايللی حضور ثابت کړي.
انس حقاني په دې اړه زیاتوي: « اوس مساله دلته دا ده چې دوی د خپل ځان ثابتولو لپاره دغسې نرمو اهدافو ته مخه کړې. تاسو وینئ چې کله په مسجدونو کې بېګناه خلک وژني او کله هم دنیا ته د ځان ښودنې او خپلو سپانسرانو ته د ځان ثابتولو لپاره، ځینې بریدونه کوي.»
بله خوا، همدا تېره سه شنبه د پاکستان دفاع وزير په افغانستان کې د پاکستان ضد عناصرو د موجوديت ادعا وکړه، خو د سیاسي چارو شنونکي د داعش له لوري وروستيو بريدونو ته په کتو، په افغانستان کې د ورته امنيتي پېښو ګوته پاکستان ته نیسي او وايي، دغه بریدونه د پاکستان په اشاره ترسره شوې دي.
د سیاسي چارو شنونکی توریالی ځاځی وايي: « د نړیوالو هېوادونو او په ځانګړې توګه پاکستان او ایران دا اندېښنه چې وايي په افغانستان کې داعش ډله شتون لري، دا هېوادونه د دې اندېښنې حق نه لري؛ ځکه چې همدغو هېوادونو د افغانستان په هکله په دې څو لسیزو کې ناروا بشري جنایتونه ترسره کړي، د داعش او القاعدې د روزنې ځاله او مرکز پاکستان و او دی.»
د سیاسي چارو شنونکی اختر محمد راسخ: « داعش د پاکستان د استخباراتو له لوري جوړه شوې ډله ده او د دې ډلې لپاره لابي هم د پاکستان استخبارات کوي. همدارنګه د عملیاتو لپاره یې پلانونه او خام مواد په واک کې ورکوي. د دغو عملیاتو پړه یوازې پر داعش اچول، په سیمه کې یې بریدونو ته هڅول، روزل او اکمالول ټول د پاکستان د استخباراتو له خوا کېږي.»
ځينې نور بیا پاکستان او یو شمېر نور هېوادونه له داعش سره په همکارۍ تورنوي او وايي، دغو هېوادونو داعش ډلې ته ځای ورکړی او په افغانستان کې یې بريدونو ته استوي.
د سیاسي چارو شنونکی عزیز معارج وايي: « په دې خو ټوله نړۍ پوهېږي چې د ترهګرو پټنځایونه او روزنځایونه په پاکستان کې دي او دوی یې ملاتړ هم کوي. دا چې په دې وروستیو کې د نړیوالو له خوا هم د داعش په تړاو ډېرې خبرې کېږي او له بلې خوا یې پاکستان هم د یوې پروژې په توګه مکررا ً یادوي، زه داسې انګېرم چې غربي نړۍ غواړي د پاکستان په وسیله داعش ډله افغانستان ته راولي او دا سیمه د خپلو ګټو لپاره بې ثباته کړي او خپل اهداف مخ ته یوسي.»
خلک له سرپرست حکومته غواړي چې له تېرو بريدونو په درس اخيستلو سره دې د راتلونکي کال په امنيتي پلان کې د امنيت ضد ټولو ابعادو ته پاملرنه وکړي.
