د پاکستان امنیتي ادارو د وروستيو اروزنو له مخې، روان کال په خيبر پښتونخوا او قبايلي سيمو کې وسله وال بريدونه زيات شوي او په پایله کې يې پاکستاني ځواکونو ته له درنې مرګ ژوبلې اوښتو سربېره، د پاکستان د پوځ ځينې پوستې او قرارګاوې هم د وسله والو لاس ته لوېدلې دي.
همدې ناامنیو ته په کتو، د پاکستان دفاع وزیر خواجه آصف په یوه مرکه کې ویلي، له کابل سره د اسلام اباد يوازینۍ ستونزه هلته د پاکستان ضد عناصرو موجوديت دی.
د آصف په خبره، له هغې راهيسې چې سرپرست حکومت په افغانستان کې واک ترلاسه کړی، ورسره سم د پاکستان تر کنټرل لاندې سيمو کې تاوتریخوالي هم زور اخیستی.
آصف زیاته کړې:« موږ د افغانستان له واکمنانو سره یوه ستونزه لرو او هغه دا ده چې دوی په افغانستان کې ټيټيپي ته پناه ورکړې او دغه ډله له هغه ځایه بریدونه پلانوي او بیا دلته زموږ امنیت ګواښي.»
د سیاسي چارو کارپوهان دغه تورونه تکراري او بې ځایه بولي او زياتوي، پاکستاني چارواکو د خپلو ورته ادعاوو د اثبات لپاره هېڅ اسناد نه دي وړاندې کړي.
د سیاسي چارو کارپوه روح الله هوتک وايي: « پاکستان په دې ډول څرګندونو او تورونو سره د افغانستان د انزوا هڅه کوي او پر افغانستان د فشار راوستو لپاره لابي ګري کوي او غواړي چې پر نړیواله سطحه د افغانستان پر وړاندې ننګونې جوړې کړي؛ حال دا چې په افغانستان کې سراسري امنیت موجود دی، ثبات راغلی او د ټولو ترهګرو ډلو پر وړاندې جدي مبارزه کېږي.»
سرپرست حکومت تازه د پاکستان دفاع وزير ادعا په اړه څه نه وایي، خو وړاندې یې په افغانستان کې د تحريک طالبان پاکستان موجوديت رد کړی دی.
د سیاسي چارو کارپوهان ټينګار کوي چې اسلام اباد دې له شواهدو پرته د ورته ادعاوو پر ځای، د خپل امنيت پر ټينګولو تمرکز وکړي.
د سیاسي چارو کارپوه نجیب الرحمن شمال په دې اړه وايي: « په افغانستان کې د ټي.ټي.پي او نورو وسله والو ډلو شتون چې د پاکستان حکومت پرې تل ټینګار کوي، له یوې بهانې پرته بل څه نه دي. د سرپرست حکومت د چارواکو په خبره، دغه ډلې په افغانستان کې نه شته او افغانستان دا مهال هغه هېواد نه دی چې نورو هېوادونو ته ترې ګواښ پېښ شي. پاکستان باید د ټي.ټي.پي ستونزه په کوردننه حل کړي.»
د دوشنبې په ورځ د خیبر پښتونخوا اعلی وزیرعلي امین ګنډاپور ویلي، دامهال د تحريک طالبان پاکستان (ټي.ټي.پي) له ۱۶ تر ۱۸زرو جنګيالي په قبايلي سيمو او خيبرپښتوخوا کې فعال دي.
