د امریکا ولسمشریزو ټاکنو ته یوازې څو ساعتونه پاتې دي او د دغو ټاکنو له ترسره کېدو وروسته به امریکایان د جو بایډن ځای ناستی وټاکي.
په دغو ټاکنو کې د جمهوریت غوښتونکو ګوند نوماند ډونالډ ټرامپ او د دیموکرات ګوند نومانده کاملا هریس د امریکا د ولسمشرۍ څوکۍ لپاره سیالۍ کوي.
دا چې امریکا نړیوال اقتصادي او نظامي زبرځواک هېواد دی، نو ټاکنې یې هم د هېوادونو لپاره مهمې دي.
افغانستان هم یو له هغو هېوادونو دی چې د امریکا په بهرنۍ ستراتیژي او تګلاره کې ځای لري او ښايي نوی حکومت یې د افغانستان په تړاو هم نوې پرېکړې وکړي.
دوی وايي، د امریکا د ولسمشریزو ټاکنو له ترسره کېدو وروسته به د دغه هېواد راتلونکی حکومت د اوکراین او منځني ختیځ ترڅنګ د افغانستان په تړاو هم په خپلو تګلارو له سره غور او کتنه وکړي.
د پوهنتون استاد فیض محمد ځلاند وايي: « د امریکا ټاکنې خپل وروستي پړاو ته داخلیږي او د سه شنبې په ورځ یې د رایې اچونې وروستۍ نېټه ده. د ټاکنو په پایله کې نوې اداره کولی شي د راتلونکو د کلونو لپاره د امریکا کورنۍ او بهرنۍ پالیسي له سره وارزوي، ترسیم او انځور یې کړي. له همدې امله تمه کېږي چې د افغانستان په مساله کې د امریکا نوې اداره هغه که هر لوری یې ګټي، هریس وي که ټرمپ، دوی به دې ته لېوالتیا ولري چې د افغانستان په تړاو پر خپله تګلاره له سره کتنه وکړي.»
خو ځینې نور بیا په دې اند دي چې د امریکا لپاره افغانستان مهم دی او لکه څه ډول چې اوس د افغانستان په قضیو کې لاس او دلچسپي لري، له ټاکنو وروسته به هم همدا ستراتیژي تعقیب کړي او ښايي خاص بدلون په کې را نه شي.
د دوی په اند، د امریکا بهرنۍ ستراتیژي د یوه سیسټم له مخې وړاندې ځي او د ټاکنو له لارې د افرادو په بدلون سره په کې بدلون نه راځي.
د سیاسي چارو کارپوه عزیز معارج وايي: « د امریکا بهرنی سیاست یا بهرنۍ پالیسي د نوي جمهور رییس په راتګ سره، یا د حکومت په بدلون یا هم ټاکنو سره نه بدلېږي بلکې دا پالیسي له مخکې د نړۍ پر کچه، د سیمې پر کچه او د مهال پر کچه تیاره جوړه شوې وي او هر رییس جمهور چې راځي، هماغه عملي کوي. خو اوس خبره دا ده چې د پلي کولو نوعیت او ماهیت به په کوم ډول باندې کېږي، هغه بیا توپیر کوي، په نوې کابینه او ولسمشر پورې اړه لري. بله خبره دا ده چې د امریکا زیاتره پروګرامونه دې ته منتظر دي چې دوی په ټاکنو او کمپاینونو اخته دي او له همدې امله یې افغانستان او نورې نړۍ ته پاملرنه کمه وي.»
د سیاسي چارو کارپوه شهزاده مسعود وايي: « بې له شکه چې د امریکا متحده ایالتونه د نړۍ پر کچه لوی قدرت دی او دا چې هلته انتخابات کېږي او کوم یو کاندید بری ترلاسه کوي، زه فکر کوم خاص تغییر به په کې را نه شي؛ ځکه چې د امریکا متحده ایالات چې کومه دلچسپي په ځانګړې توګه سیمه کې له افغانستان سره لري، هغې ته به ادامه ورکړي. زه فکر کوم هلته یو سیسټم دی چې د افرادو په تغییر او تبدیل سره په کې خاص تغییر نه راځي بلکې کار د سیسټم له خوا پرمخ وړل کېږي.»
سرپرست حکومت بیا تل ټینګار کړی چې پر افغانستان د یرغل کوونکې امریکا په ګډون، له ټولې نړۍ سره ښې او په متقابل درناوي ولاړې اړیکې غواړي او ډاډ ورکوي چې له افغان خاورې به هېڅ هېواد ته ګواښ پېښ نه شي.
موده وړاندې د امریکا ولسمشریزو ټاکنو نوماند ډونالډ ټرامپ په خپلې یوې ټاکنیزې غونډې کې د هغو ټولو لوړ پوړو نظامي امریکايي چارواکو له دندو لرې کولو خبرداری ورکړ چې د ټرمپ په خبره، له افغانستانه د امریکايي ځواکونو د ایستلو پرېکړه کې یې لاس درلود.
ډونالډ ټرمپ هر وخت له افغانستانه د امریکا وتلو په مساله کې د جو بایډن پر ادارې تندې نیوکې کړې او دغه پریکړه یې د امریکا په تاریخ کې شرموونکې پېښه بللې.
