د اوبو او انرژۍ وزارت له لوري د کابل ولایت په سروبي ولسوالۍ کې د نغلو ۱۰ مېګاواټه لمریزې برېښنا پروژه ګټې اخیستنې ته وسپارل شوه.
د دې پروژې د ګټې اخیستنې په مراسمو کې د اوبو او انرژۍ وزارت سرپرست عبداللطیف منصور وویل، په تېرو درېیو کلونو کې د لږو امکاناتو په وسیله لویې پروژې تطبیق شوې او په خبره یې، په نږدې راتلونکي کې به له ترکمنستان سره د ۱۰۰۰ مېګا واټه اضافي برېښنا د واردولو هوکړه لیک هم لاسلیک شي.
مصنور د هغو ادعاوو په تړاو چې ګواکې امریکا اسلامي امارت ته ډالري کڅوړې رالېږي هم وضاحت ورکړ او زياته يې کړه، دغه کڅوړې د ملګرو متلونو هغو قراردادي انجیوګانو ته وېشل کېږي چې په افغانستان کې د دغه سازمان اړوند پروژې پلي کوي.
منصور زیاته کړه:« کوم کار چې موږ له خصوصي شرکتونو سره د ۱۰۰۰ مېګاواټه برېښنا د تولید لپاره پیل کړی، یوه پروژه یې همدا ده. ۱۰۰۰ مېګاواټه نوره برېښنا به له تورکمنستان په ډېره ارزانه بیه راشي او په دې سره به زموږ ډېرې اړتیاوې پوره شي. ډالري کڅوړې د انجیوګانو پیسې دي او اسلامي امارت ته نه ورکول کېږي.»
چارواکي وايي، د اسلامي ا مارت په راتګ سره لومړیتوبونه هغو پروژو ته ورکړل شوي چې اړتیا ورته ډېره وه.
دوی وایي، په هېواد کې ډاډمن امنیت د پانګونې لپاره ښه زمینه برابره کړې او له پانګوالو غواړي چې په افغانستان کې پر هغو برخو پانګونه وکړي چې د خلکو اړتیا ورته زیاته وي.
د چارو ادارې مشر نورالحق انور وايي: « د اسلامي امارت لومړیتوب دا دی چې باید محرومیتونو ته رسېدنه وشي.»
د کابل والي مولوي عبیدالله وايي: « موږ ټولو پانګوالو ته ډاډ ورکوو چې د دوی امنیت تأمین دی او زمینه برابره ده چې پانګونه وکړي.»
بله خوا د لمریزې برېښنا پروژې تطبیق کوونکي شرکت مسوولین وایي، د یاد وزارت له لوري ورکول شوې پروژه یې په ټاکلي وخت بشپړه کړې او په خبره یې له داسې موادو یې ګټه اخیستې چې په سیمه کې ساری نه لري.
د خصوصي شرکت مسوول احمد پهلوان وايي: « پانګوالو او سوداګرو ته وایم چې راشي او دلته پانګونه وکړي. څوک چې د باندې انتظار دي، نور د خپل انتظار پای ته ورسوي.»
د خصوصي شرکت مسوول صفيالله وايي: « په دې پروژه کې د داسې شرکتونو له خوا جوړ شوي وسایل کارول شوي چې ساری یې په سیمه کې نه دی لیدل شوی او دغه وسایل به د ضایعاتو مخنیوی وکړي.»
د څه کم ۸ میلیونه ډالرو په پانګونې سره دغه پروژه چې یوه خصوصي شرکت ته ورکول شوې وه، ۲ زره کسانو ته په مستقیم او ۵ زره کسانو ته په غیر مستقیم ډول د کار زمینه برابروي.
چارواکي وايي، له عمومي شبکې سره تر نښلولو وروسته به له دې برېښنا څ د کابل او ننګرهار۱۰ زره کورنۍ برخمنې شی.
