تحلیل کوونکي وایي، اوس د جګړې ټولې خواوې په دې باوري شوي چې د جنګ حل سیاسي لار ده.
افغان حکومت ویلي، د سولې په اړه ټول خنډونه له مخې پورته شوي او په دې برخه کې د یو شمېر هېوادونو هڅې هغه څه ګڼل کیږي چې د حکومت تر څنګ یې عام افغانان هم هیله من کړي.
د امریکا او روسیې له لوري د افغان سولې په برخه کې د ځینو ګامونو له پورته کېدو وروسته داسې ښکاري چې د جګړې ټولې خواوې د افغانستان د کړکېچ یوازینۍ حل سیاسي لار ګڼي.
اوس ولسمشر غني له هر بل وخت زیات باوري دی چې هېواد کې روان اوږد جنګ به یې په سوله بدلیږي.
تحلیل کوونکي وایي، د جګړې د خواوو له لوري د شرطونو ساده کېدل او په نړیواله کچه سولې ته د وسلوالو طالبانو لېوالتیا هغه ښکاره لمس کوونکي پرمختګونه دي چې ولسمشر غني یې زیات باوري کړی.
د مسکو له ناستې وروسته چې طالبان په لومړي ځل د کرملین په سټېج راڅرګند شول او په نړیواله او سیمه ییزه کچه یې د جګړې پرسر د هېوادونو هغه اجماع وننګوله چې د سولې پرځای په جګړې ټینګار و.
امریکا ،طالبانو او مسکو ترمنځ په خبرو کې انعطاف او د سولې په برخه کې د پاکستان رضایت نور هغه مهم ټکي دي چې افغانستان کې یې د ثبات لپاره هیلې لا ډېرې غښتلې کړي.
افغان حکومت باور لري چې د سولې په وړاندې جدي خنډونه ټول له مینځه تللي دي او اوس وخت د دې ده چې وسلوالو طالبانو سره مخامخ خبرې پیل او دا پروسه د بریالیتوب خواته لاړه شي.
د ولسي جرګې مشر عبدالروف ابراهیمي ټینګار کړی چې داسې سوله دې وشي چې د افغانانو د یوې نیمې لسیزې پرمختګونه ونه ننګول شي.
سره له دې چې امریکا او روسیه غواړي افغانستان کې جګړه پای ته ورسوي خو له بلې خو دواړه لوري یو پر بل سختې نیوکې لري چې ګڼې د افغانستان په کورنیو چاروکې لاس وهنه کېږي او جګړه اوږدیږي.
پنټاګون د افغان سولې په تړاو له قطر مننه کړې چې ځینو برخو کې یې زمینه سازي کړې چې طالبانو سره خبرې وشي.
