له هغې وروسته چې پر ډيورنډ فرضي کرښه د سوداګرۍ يو شمېر لارې محدودې او يا هم وتړل شوې، سوداګر د پښتونخوا له لارې له پاکستان سره د سوداګرۍ په نیت، د خوست غلام خان بندر ته ورمات شول.
خو اوس سوداګرو او موټر چلوونکي وايي، پر دې لار د کافي سوداګریزو اسانتیاوو نه شتون له ګڼو ستونزو سره مخ کړي دي.
سوداګر فیض محمد وايي: « ما په خپله لارۍ کې انګور بار کړي او۲۸۹ زره افغانۍ مې مصرف کړی. زه چې کله را ورسېدم ومې لیدل چې ۴۰۰ لارۍ له ما مخکې او نوبت ته ولاړې دي. هره ورځ یوازې ۱۰۰ موټر اوړي؛ ترهغو چې ما ته نوبت راځي، انګور مې خرابېږي.»
ورته مهال، یو شمېر نور سوداګر او موټر چلوونکي هم نیوکه کوي چې د لارې بندیدو او په ورځنۍ بڼه د کمو توکو انتقال د دې لامل شوی چې د تازه سبزیو او مېوو ډېره برخه خرابه شي او له امله یې دوی ته میلیونونه افغانۍ تاوان واوړي.
موټر چلوونکی محمد غني وايي:« د سهار له نهو د ورځې تر درېیو بجو موټر پرېږدي چې پاکستان ته واوړي. په دې موده کې ډېر لږ موټر اوښتلی شي. باید ټوله ورځ او د شپې له مخې هم تګ راتګ وشي.»
یو بل موټر چلوونکی سید احمد وايي: «اسلامي امارت باید اسانتیاوې برابرې کړي. باید له پاکستان سره خبرې وشي ترڅو د لاریو تګ راتګ چټک شي. »
اخوا ځایي چارواکي که څه هم په غلام خان بندر کې د عادي تجارت د دوام ډاډ ورکوي، خو ترڅنګ یې زیاتوي چې پر یاده لاره د لا ډېرو اسانتیاوو رامنځته کېدو په موخه، د دواړو حکومتونو ترمنځ خبرې روانې دي.
د خوست د اطلاعاتو او کلتور رییس شبیر احمد عثماني وايي: « لاره همدا اوس هم خلاصه ده او هېڅ ستونزه نه شته. البته د موټرو تعداد زیات دی او نه شي کېدای ټول په یوه ورځ تېر شي. هڅې روانې دي ترڅو دغه ستونزه هم ژر تر ژره هواره شي.»
غلام خان بندر د پښتونخوا له لارې له پاکستان سره د نورو سوداګریزو لارو په پرتله خورا لنډه لار بلل کېږي، خو دغه لاره ستونزې هم لري.
کالونه کېږي سوداګر او د دې ولایت اوسېدونکي د رسمي ټرانزیټ او په کې د بشپړو سوداګریزو اسانتیاوو غوښتونکي دي.
