د کندهار پنجوايي ولسوالۍ کې بڼوال په خپلو دودیزو ممیز خونو کې د انګور تر ځوړندولو او وچولو وروسته تولید شوي ممیز پاکوي.
دا مهال د پنجوايي په ګډون د کندهار په هغو ولسوالیو له انګورو د ممیزو تولید پيل شوی چې د انګورو پراخ باغونه په کې ودان دي.
د عبدالله په نوم بڼوال، د ممیزو د تولید پروسې په اړه وايي:« څنګه چې انګور پاخه شي، بیا یې د ممیزو جوړولو لپاره راټولول پیل کړو. پخوا مو دغه کار په ممیز خونو کې کاوه او هلته مو ځوړندول خو اوس یې په جګیانو کې کوو. دا کار له هغه پخواني کاره اسانه دی او لږ لګښت غواړي.»
د انګورو بڼوال له طبیعت ګیله لري او وايي، سږکال يي د ممیزو حاصلات د بې وخته بارانونو او له هغې وروسته زیاتې ګرمۍ له امله کم دي او هم یې بیې ټیټې دي.
دغه راز دوی له سرپرست حکومته غوښتنه کوي چې د پاتې حاصلاتو لپاره ورته بازار پیدا کړي.
د انګورو یو تن بڼوال وايي: « هره کیلو ممیز له ۶۰۰ تر ۱۰۰۰ افغانیو پلورل کېږي. سږ کال د تېرو کالو په څېر ښه ممیز نه شته. د ممیزو تولید یخې هوا او بادونو ته اړتیا لري خو سږ کال هوا ډېره توده وه؛ ځکه نو ښه ممیز تولید نه شول.»
د انګورو او ممیزو یو تن کاروباري وايي: «سږني ممیز په بازار کې هېڅ قېمت نه لري، تر ټولو ښه ممیز له ۳۰۰ تر ۳۵۰ افغانیو پلورل کېږي.»
د مالوماتو له مخې، هرکال په کندهار کې د انګورو د حاصلاتو څلورمه برخه په ممیزو اړول کېږي. د کندهار سوداګرۍ خونې مسوولین وايي، له دې ولایته په تېرو پنځو میاشتو کې د ۳۳ میلیونه امریکايي ډالرو په ارزښت تر ۱۳ زره ټنو زیاته وچه مېوه بهر او په ځانګړي توګه هندوستان ته صادره شوې چې ډېره برخه یې ممیز وو.
د کندهار د سوداګرۍ او صنایعو خونې مرستیال انجینرعبدالباقي بینا وايي: « سږ کال ۱۳ زره ۷۹۷ ټنه وچه مېوه، طبي بوټي او زڼي بهر ته صادر شوي. د دغې مېوې ډېره برخه ممیز، بادام او پستې جوړوي.»
که له یوې خوا روان کال د اقلیمي بدلونونو له امله د کندهار هر ډول کرنیزو حاصلاتو ته زیان اوښتی؛ بله خوا، د ګاونډیو هېوادونو له خوا د لارو بندول، د هوايي دهلېزونو کمښت او ځینې نورې ستونزې لامل شوې چې راټول شوي حاصلات هم ښه بازار ونه لري.
