د ازبېکستان په ترمذ ښار کې افغان-ازبېک تازه ګډ پرانيستل شوي بازار کې د خلکو ګڼه ګوڼه ورځ تر بلې په زياتېدو ده.
د دې بازار مسوولین وايي، له هر پلوه د دې بازار اړتياوې سنجول شوي او له همدې کبله هوټلونه، جوماتونه، پارکونه او روغتون په کې جوړ شوي دي.
په دې ګډ بازار کې ټولټال ۵۰۰ دوکانونه شته چې د ۴۰۰ فعالو هغو له ډلې يې يوازې ۵۰ د افغان سوداګرو اړوند دي.
د افغان-ازبېک ګډ بازار مسوول سنجر صادقاوف وايي: « په دې نړیوال سوداګریز مرکز کې موږ د پېر او پلور برخې، دوکانونه او پر ټولو طبي امکاناتو سمبال مجهز روغتون لرو چې روغتيايي خدمتونه په کې وړاندې کېږي. همداراز د مسافرو پاتې کېدو لپاره مېلمستونونه او رسټورانټونه هم شته. په یاد بازار کې د ۵۰۰ دوکانونو له ډلې ۵۰ بابه یې تر دې مهاله افغان سوداګرو کرايه کړې دي.»
دوی دغه بازار د افغانستان او ازبېکستان د کورنيو توليداتو د ودې، د دوه اړخيزې سوداګرۍ د پياوړتيا او خلکو ته د کار موندنې له امله مهم ګڼي او له افغان پانګوالو غواړي چې په دې بازار کې لا زياته پانګونه وکړي.
د افغان-ازبېک بازار یو تن هټیوال عبدالغفار ایرګشف وايي: « دا د افغانستان او ازبېکستان ترمنځ د دوستۍ ګډ بازار بللی شو او باید له همدې لارې خپلې دوه اړخیزې اړیکې لا پیاوړې کړو. د بازار یوه ښېګڼه دا هم ده چې ازبېکستاني او افغاني تولیدات نړيوالو ته معرفي کوي او د دواړو هېوادونو د تولیداتو اړوند فروشات زیاتوي.»
په همدې حال کې یو شمېر هغه افغان سوداګرو چې په دې بازار کې یې دوکانونه کرايه کړې، که څه هم له خپل کاروبار خوښ دي، خو غوښتنه کوي چې ترمذ ته د تګ راتګ پرمهال دې يې په پوله کې شته ستونزې حل شي.
د محمد اسحاق په نوم یو تن افغان سوداګر وايي: « دا د دواړو هېوادونو ترمنځ ګډ او خورا ګټور بازار دی. دلته افغانان، ازبېکان او د آسیا د نورو هېوادونو خلک کولی شي خپل توکي راوړي. د تګ راتګ پر لارو ستونزې شته او ډېر زیات چک پاینټونه دي. دا باید کم کړي ترڅو خلک په اسانۍ سره تګ راتګ وکړي.»
همدارنګه بل افغان سوداګر نقيب الله وايي: « دلته راغلی یم چې یو دوکان فعال کړم. یو شمېر دوکانونو ته مې نوملیکنه هم وکړه. دلته شته چارواکي ډېر ښه خلک دي او غواړي دغه بازار پرمختګ وکړي. ښه خبره دا ده چې دلته له افغانستان څخه له راوړل شویو توکو ګمرک نه اخلي او نه هم له دې خوا افغانستان ته وړل کېدونکي توکي ګمرک کېږي.»
له دې سره، ځايي چارواکي د افغاني تولیداتو لپاره مهم ګڼي او وايي، د دې سوداګریز بازار له امله به په کور دننه د تولیداتو کچه زیاته او بهر کې به د افغاني توکو د پلور بازار ګرم شي.
دوی ګډ بازار ته د خلکو په تګ راتګ کې ستونزې مني، خو وايي ټاکل شوې په راتلونکي کې د حل لپاره د دواړو هېوادونو تر منځ یوه طرزالعمل جوړ شي.
د بلخ د صنعت او سوداګرۍ ریاست مرستیال نصیر احمد نیازی وايي: « موږ منو چې اوسمهال په تګ راتګ کې ځینې ستونزې شته، خو د دواړو خواوو چارواکي په یوه ګډه تګلاره کار کوي چې ډېر ژر به جوړه شي. د دې تګلارې په پلي کېدو سره به د خلکو ستونزې تر ډېره هوارې شي.»
د افغان- ازبېک ګډ بازار د ازبېکستان د سرخان دریا ولایت اړوند ترمذ ښار ته څېرمه د ازبېکستان له لوري د ٧٥ میلیونه ډالر په ارزښت جوړ شوی دی.
