په بلخ کې د نندارتونونو لپاره دایمي مرکز پرانیستل شو
په بلخ ولایت کې د کورنیو تولیداتو د ملاتړ او ځایي صنعت کارانو د هڅولو په موخه د لومړي ځل لپاره د نندارتونونو یو دایمي مرکز پرانیستل شو.
د مزار شریف ښار د دې نندارتون په غرفو کې به له دې وروسته کورني تولیدات او لاسي صنایع نندارې ته وړاندې کېږي.
مسوولین وايي، پر دغو ۶۵ غرفو نږدې دوه میلیونه افغانۍ لګښت راغلی او موخه یې موخه د سوداګرو او صنعتکارانو ملاتړ دی.
د نندارتون جوړوونکي شرکت مشر صبور کمال وايي: « دلته به زموږ ډېرو خلکو ته د کار زمینه برابره شي. دولتي ادارې، خصوصي بنسټونه او سوداګر کولی شي په دې نندارتون کې خپل توکي او تولیدات نندارې ته وړاندې کړي. موږ غواړو، کورنیو تولیداتو ته په کور دننه او بهر کې بازار موندنه وکړو.»
په شمال کې د نندارتونونو د دایمي مرکز مسوول لعل محمد دروېش وايي:« دغه ځای د کورنیو تولیداتو د ملاتړ لپاره جوړ شوی او په کې ۶۵ غرفې، ۱۸ خونې او د ۱۰۰ موټرو لپاره تم ځای په پام کې نیول شوي. پر دغه نندارتون نږدې ۱.۲میلیونه افغانۍ لګښت راغلی.»
په ورته مهال یو شمېر سوداګر په بلخ کې د نندارتونونو د جوړولو لپاره د دایمي مرکز د پرانیستې هرکلی کوي، خو له چارواکو هم غواړي، چې د صنعت د لا ودې لپاره هغه څه وکړي، چې صنعت کاران او سوداګر یې تمه لري.
سوداګر هاشم ایشان وايي: «موږ د وېزې په ګډون له بهرنۍ نړۍ سره د اړیکو په تړاو ځینې ستونزې لرو؛ تمه لرو، دغه نندارتون وکولی شي موږ له بهرنیو او کورنیو پېرودونکو سره ونښلوي.»
سوداګر ذین الله عثماني بیا وايي: «موږ په افغانستان کې تر ټولو غوره مېوې، تولیدات او صنعت لرو ، خو له بده مرغه تراوسه مو د دغو توکو د معرفي کولو لپاره ځای نه درلود.»
که څه هم افغانستان د صنعت په برخه کې د ۶۲ تولیدي توکو له پلوه پر ځان بسیا بلل کیږي، خو بیا هم باور دا دی، چې د کورنيو تولیداتو د ودې او بازار موندنې لپاره باید دغه شان ګامونه واخیستل شي.
د بلخ د صنایعو او کانونو رییس امام الدین سنایي زاده وايي: « اسلامي امارت له هر هغه کس څخه ملاتړ کوي، چې دلته کار ایجاد کړي. دا د اقتصادي او صنعتي ودې لپاره یو مهم ګام دی. افغانستان په ۶۲ سکټورونو کې پرځان بسیا دی، خو اکثریت خلک په دې نه دي خبر؛ ځکه چې د دوی د معرفي لپاره نندارتونونه نه دي جوړ شوي.»
دغه دایمي نندارتون په داسې حال پرانیستل کېږي، چې تر دې وړاندې بلخ ولایت کې صنعت کارانو د کورنيو تولیداتو د معرفي کولو لپاره ځای نه درلود او دا یې لویه غوښتنه وه، چې نن د یوه خصوصي بنسټ له لوري پوره شوه.
