د کانونو او پټرولیم وزارت له پنځلس کلن ځنډ وروسته د مس عینک کان د کېندنې عملي چارو د پيلدو خبر ورکوي.
د دغه وزارت ویاند همایون افغان وايي، د دې کان کېندنې عملي چارې به د روانې اوونۍ په پای کې کې پیل شي، چې د قراداد له مخې، به مسووله کمپنۍ د پروسس ۱۰۰ سلنه چارې د شویو هوکړو پر اساس ترسره کوي.
د افغان په خبره، د لوګر ميس عينک کان د چارو په پیل سره به شاوخوا ۱۳ زره کسانو ته په مستقیم او غیر مستقیم ډول د کار زمینه هم برابره شي .
هغه زیاتوي:« له کلونو ځنډ او انتظار وروسته د اسلامي امارت پرله پېسې هلو ځلو د هېواد سترې اقتصادي پروژې مس عینک عملي چارې به سبا د یوې ناستې په لړ پیل شي. د نړۍ پرکچه د مسو ستر کان چارې به د هېواد ملي ګټو پر اساس او د قراردادي کمپنۍ له پخوانیو ژمنو سره سم پیل شي. د مس عینک پروژې سره به یو لوی اقتصادي تحرک رامنځته شي او ۳ زره هېوادوالو ته په مستقیم ډول او ۱۰ زره هېوادوالو ته به په غیر مستقیم ډول کاري فرصتونه پیدا شي.»
د مس عینک کان تړون د ۳۰ کلونو لپاره له ایم.سي.سي چینايي کمپنۍ سره لاسلیک شوی و، خو د مخکېني حکومت پر مهال په دې سیمه کې د لرغونو اثارو د موندلو په ګډون د بېلابېلو لاملونو له امله یې د کېندنې چارې نه وې پیل شوې.
په ورته مهال اقتصاد وزرات وایی، د مس عینک کان کنېدنه به په هېواد کې یو ستر بېخ بینايي اقدام وي، چې د ملي اقتصادي پیاوړتيا په برخه کې به ګټور تمام شي.
بلخوا د اقتصادي چارو کارپوهان، د مس عینک کان د عملي کار پیل د هېواد اقتصادي ودې لپاره ښه ګام بولي، خو دې د دې کان کېندنې پر وړاندې د پخوانيو ستونزو د حل تمه لري.
د اقتصادي چارو کارپوه نور الله عزیز وايي:« د افغانستان طبیعي زیرمې په هر وخت کې د افغانستان د اقتصادي پرمختګ لپاره موثرې تمامېدی شي. دا په هغه وخت کې ممکنه ده، چې د دغو کانونو ښه مدیریت وشي او په دغو برخو کې نورې پانګونې وشي. دا چې په دې وروستیو کې د مس عینک د بیا کېندنې یا په دغه برخه کې د کار شروع کېدو هڅې روانې دي، دا یو مثبت پیل دی.»
د مس عینک کان د کابل سویل ختیځ په ۴۰ کیلومترۍ کې موقعیت لري، چې په نړۍ کې د مسو دویمه لویه زیرمه ده او د افغانستان د طبیعي شتمنیو یوه لویه سرچینه ګڼل کیږي.
