له پاکستان سره په سوداګرۍ کې پر ستونزو سربېره چې په ټرانزیټ کې یې له خپلو بندرونو افغانستان ته لاسرسی محدود کړی اوس افغانستان د چابهار بندر؛ له ایران سره د راکړې ورکړې سربېره له منځنۍ اسيا سره د وصلیدو لپاره ښه بدیل موندلی دی.
د صنعت او سوداګرۍ وزارت سرپرست نورالدین عزیزي او ورسره مل پلاوي د ایران د سیستان او بلوچستان له والي سردار محمد کریمي او د هغه هېواد د ولسمشر ځانګړي استازي سره لیدنه کړې او دواړو هېوادونو ترمنځ د سوداګرۍ د پراختیا او د چابهار بندر له لارې د ټرانزیټ د پیاوړتیا په اړه یې هر اړخیزه خبرې اترې کړې دي.
سرپرست وزیر د دواړو هېوادونو ترمنځ د سوداګرۍ پر وړاندې د ځېنو ستونزو او ننګونو د مطرح کولو په لړ کې د هغو پر حل هم خبرې کړې دي.
د صنعت او سوداګرۍ وزارت ویاند اخندزاده عبدالسلام جواد وايي: « د دوو هېوادونو ترمنځ د سوداګرۍ د پراختیا او د چابهار له لارې د ټرانزیټ د پیاوړتیا لپاره هر اړخیز بحث او د نظرونو تبادله وشوه. د صنعت او سوداګرۍ وزارت سرپرست الحاج عزیزي د دواړو هېوادونو ترمنځ د سوداګرۍ پر وړاندې د یو لړ ستونزو او ننګونو د مطرح کولو ترڅنګ د هغې په له منځه وړلو ټینګار وکړ او د ټزانزيت د پیاوړتیا، له دې ډلې اړینې اسانتیاوې، د بیو راټیټول، په چابهار کې د ټاکل شویو ځمکو د قطعاتو د بیو نهايي کول، له چابهاره د ټرانزیټي مالونو د امتیازي او اختصاصي لارې ټاکل او د چابهار په لاره کې د سړکونو او اوسپنې پټلۍ د امکاناتو او اسانتیاوو برابرول، د چاه بهار له لارې د ټرانزیټي قرنتینو د محدودیتونو له منځه وړل او ټرانزیټي تمځایونه مطرح کړل، د سیستان او بلوچستان ولایت والي کریمي د سوداګرۍ د پراختیا او ټرانزیټ د پیاوړتیا پر وړاندې د مطرح شویو ستونزو د له منځه وړلو لپاره اړونده مسوولینو ته لازمې لارښوونې وکړې.»
د چارو کارپوهان وایي، افغانستان به وتوانېږي په کم وخت او کمه بیه د چابهار بندر له لارې ټرانزیټ ترسره کړي.
د دوی په باور پر چابهار بندر کار او فعالیت به سوداګرۍ ته وده ورکړي، چې له منځنۍ آسیا هېوادونو سره سوداګرۍ ته لاره پرانېزي.
د صنعت کارانو ټولنې مشرعبدالجبارساپی وايي: « د افغانستان لپاره چابهار هم د لګښتونو او هم د وخت له مخې ګټور تمامېږي، چې له دې لارې ټرانزیټ موږ ته په ټیټه بیه تمامېږي او واردات او صادرات به په کم وخت کې ترسره کېږي او ترڅنګ یې موږ کولی شو چې له هندوستان سره هم وصل شو.»
د اقتصادي چارو شنونکی یونس ځدراڼ وايي: « په دې بندر چې څومره کار وشي او څومره اسانتیاوې رامنځته شي دا به د افغانستان د سوداګرو لپاره ډېره ښه زمینه برابره کړي، ځکه له نورو ګاونډيو هېوادونو سره چې کومې لارې لرو، هغه تل د ځېنو سیاسي فشارونو له امله بندېږي او زموږ سوداګرو ته زیان رسېږي؛ نو چابهار یو ښه بدیل دی چې په دې باید کار وشي.»
د یادونې ده، چې کابل او تهران د سوداګرۍ د پراختيا او د چابهار له لارې د ټرانزيت د پياوړتيا په موخه، د ولايتونو په کچه د يوې ګډې تخنيکي کمېټې پر جوړويدو هم ژمنتیا ښودلې، چې سوداګریز مسايل به له مرکزي کمېټې وڅاري.
