مسوولین وایي، د هرات جغرافیوي موقعیت ته په کتو او د دواړو هېوادونو سوداګرو ته په بېلابېلو برخو کې د اسانتیاوو رامنځته کولو او راکړه ورکړې زیاتوالي په موخه یاده خونه پرنېستل شوه.
د هرات سوداګرۍ او پانکونې خونې اجرائیه امر محمد یوسف امین وايي: « د خصوصي سکټور د ودې او د هغوی د ستونزو د له منځه وړلو، له دې جملې د قزاقستان د ویزو ترلاسه کول او د اړینو توکو، لکه: غنمو، اوړو او نفتي توکو د تولید لپاره د دې خونې رامنځته کول زموږ سوداګرو ته ډېر ګټور دي او ترڅنګ به یې له قزاقي سوداګرو سره د قراردادونو په برخه کې پرمختګونه ولري او افغان سوداګرو سره د شته ستونزو د حل په برخه کې هم د دې خونې رامنځته کول ګټور دي.»
د قزاقستان- افغانستان سوداګرۍ ګډې خونې رئیس ارمان یاسین طایف وايي: « په حقیقت کې هرات کې د قزاقستان – افغانستان سوداګرۍ ګډې خونې جوړولو اصلي لامل د دغه ولایت سوداګریز جغرافیوي موقعیت دی. دا چې هرات نه یوازې یو لرغونی ولایت دی، بلکي د افغانستان په لوېدیځ کې د ایران، ترکمنستان او همداراز د پاکستان هېوادونه هم سره نښلوي.»
د اقتصادي چارو کار پوهان هم د يادې خونې فعاليت افغانستان او قزاقستان ترمنځ د سوداګریزو فرصتونو پېژندلو، راکړه ورکړې زیاتوالي او د دواړو هېوادونو سوداګرو ته د اسانتیاوو رامنځته کولو په برخه کې مهم بولي.
د اقتصادي چارو شنونکی محمد داوود نورزی وايي: « په ټوله کې د سوداګرۍ ګډې خونې پانګونې د فرصتونو په پېژندنه، د دوو هېوادونو ترمنځ د ګډو نندارتونونو ترسره کولو، د شته اختلافونو د حل، د ګډو سوداګریزو ځمکو په پېژندلو او سوداګرو او پانګهوالو ته سلا او مشورې ورکولو په برخه کې مهم رول لوبوي.»
بلخوا ځایي مسوولین هم دواړو هېوادونو د سوداګرۍ ګډې خونې له پرانېستلو د ملاتړ ترڅنګ د سوداګرو ستونزو ته رسېدنې او هغوی ته د اسانتیاوو رامنځته کول خپل لومړیتوبونه یادوي.
د هرات والي ویاند نثار احمد الیاس وايي: « په هرات کې د افغانستان او قزاقستان ترمنځ یوه لویه خونه پرانېستل شوه، چې د دې خونې مسوولین دنده لري څو د افغانستان او قزاقستان د سوداګرو ترمنځ چې کومې ستونزې دي هغه له منځته یوسې، لازمې اسانتیاوې ورته رامنځته کړي او د دواړو لورو سوداګرو د سوداګرۍ د ودې او پراختیا لپاره کار وکړي. د هرات سیمهییزه اداره په دې برخه کې هڅه کوي چې لا زیات د دوی ملاتړ وکړي.»
که څه هم قزاقستان د افغانستان په څېر په وچه کې ګیر هېواد دی؛ خو د کار پوهانو په باور په منځنۍ اسیا کې د نورو هېوادونو په پرتله له مناسب اقتصادي وضعیته برخمن دی او افغانستان کولی شي، د خپل اړتیا وړ لومړني توکي له یاد هېواده ترلاسه کړي.
