سره له دې، چې وار له مخې هم پاکستان د بندرونو په تړلو او د سفر اړوند اسنادو په جبري کولو سره دې هېواد ته د افغانانو سفر سخت کړی، ترڅنګ يې د لویو بار وړونکو موټرچلوونکو ته هم مهلت ورکړی، چې راتلونکي اپريل له پيله بايد پاکستان ته د داخلېدو پر مهال د دې هېواد ویزه ولري.
له وړاندې هم پاکستان په وار وار د ویزې په پلمه د افغاني محصولاتو پرمخ خپلې ټرانزيټي لارې تړلي او په دې توګه يې افغان سوداګرو ته ميليونونه ډالر زيان اړولی دی.
د افغانستان سرپرست حکومت بيا د يادې پرېکړې په اړه د اعتراض ترڅنګ هيلهمندي ښودلې، چې د پاکستان له نوي حکومت سره په تعامل کې د یوه منظم میکانېزم له مخې به دا ستونزه حل کړي.
د اسلامي امارت ویاند ذبیح الله مجاهد وايي: « دا خو واضح خبره ده چې د سوداګرۍ لار که تړل کېږي موږ چې څومره زیان کوو پاکستان یې هم کوي، ځکه پاکستاني سوداګري د ټرانزیټ یوه لویه برخه ده او دا ټرانزیټ له افغانستانه په تورخم روان دی او له منځنۍ اسیا سره د دوی ډېر اموال تبادله کېږي، چې په دوی کې بیا خپله د دوی سوداګر زیانمن کېږي او همداسې زموږ سوداګر هم؛ خو موږ بیا نورې بدیلې لارې هم پیدا کړي نو پاکستان خپله ډېر زیانمن کېږي او موږ غواړو چې نه د پاکستان سوداګر زیانمن شي او نه د افغانستان، ځکه سوداګر د ټولنې خدمتګار دی او دوی باید د سیاست قرباني نه شي.»
په ورته مهال د سوداګرۍ او پانګونې خونې مسوولین وایي، حکومت مسوول دی چې له سوداګرو سره د پاسپورټ په ترلاسه کولو کې مرسته وکړي او په خبره يې که ستونزه حل نه شي، له مالي پلوه د سوداګرو د زيانمنېدو احتمال شته.
د پاک افغان سوداګرۍ خونې مسوول خان جان الکوزی وايي: « دا چې سوداګر ته څومره زیان رسېږي، صنعتکار ته څومره زیان رسېږي د دې وړاندوینه نه شي کېدای، تېر ځل هم په ۱۰ یا ۱۲ ورځو کې ۱۶میلیونه ډالر زیان موږ ته واوښت او اوس هم که دا لاره بنده شي نو له ډېرو جدي ستونزو سره به مخ شي، موږ د خپلې ادارې، خونو او خصوصي سکټور د مشترکو خونو له لارې اړیکې نیولې او اوس هم په اړیکه کې یو، موږ ته ویل شوي چې د روژې تر پایه به کومه ستونزه پیدا نه شي خو د دې لپاره باید تاسې لاره پیدا کړئ او حد اقل ډریو باید پاسپورټ ولري.»
د اقتصادي چارو شنونکي وايي، دواړو هېوادونو ته په کار ده، چې له انعطافه کار واخلي او په خبره یې که له پاکستان سره په سوداګرۍ او ټرانزيټ کې موجوده ستونزې حل نه شي، نو سرپرست حکومت دې بالمثل عمل تر سره کړي.
د اقتصادي چارو شنونکی محيبالله شريف وايي: « که چېرې پاکستاني چارواکي افغان سوداګرو او موټر چلوونکو ته کوم وخت چې ټاکلی، دا ونه غځوي او له دې شرطه تېر نه شي چې پاکستان ته اوښتونکی هر ډرایور او کلینر به ویزه او پاسپورټ لري؛ نو زما په نظر په دې ډول به د افغانستان او پاکستان ترمنځ، بلکې له افغانستانه به سویلې اسیا ته سوداګري ډېره ټکنۍ شي او ترڅنګ به یې افغان حکومت هم بالمثل کار وکړي او له هر پاکستاني ډریور او کلینره به ویزه او پاسپورټ وغوښتل شي.»
دا په داسې حال کې ده، چې څو میاشتې وړاندې پاکستان د خپل امنیت خوندیتوب په بهانه د عامو افغانانو په شمول پر افغان موټر چلوونکو د پاسپورټ او ویزې درلودل جبري کړل.
