د امریکا متحده ایالتونو ولسمشر په ټولنیزو رسنیو کې د یوه خبرداري په خپرولو سره ایران ته ګواښ کړی چې که د هرمز تنګی خلاص نه کړي، نو د ایران برېښناکوټونه او پلونه به له یوې مخې ویجاړ کړي.
په دې خبرداري کې د ډونالډ ټرمپ له کارولې لهجې ښکاري چې دا پیغام یې په خورا قهرجن حالت کې لیکلی.
ولسمشر ټرمپ ویلي: « د سې شنبې ورځ به په ایران کې د برېښنا کوټونو او پلونو د تباهۍ ورځ وي، دواړه به په یوه ځل له منځه یوړل شي. د دې په څېر به بل څه نه وي لیدل شوي. دا لعنتي تنګې پرانیزئ او یا دا چې ژوند به مو په دوزخ کې وي، یوازې ننداره کوئ.»
د ډونالډ ټرمپ له خوا دا خبرداری داسې مهال خپور شوی چې ایران د ۴۸ ساعتونو لپاره د امریکا غوښتل شوی اوربند رد کړ او د هرمز تنګي خلاصولو لپاره یې غوښتنې نا اورېدلې وګڼلې.
له بلې خوا، راپورونه وايي چې د امریکا پوځ داسې مهال د ځمکنیو عملیاتو د پیل لپاره په چمتوالي بوخت دی چې دېخوا ایران کې یې لپاره بشپړ چمتوالی نیول شوی.
پر ایران د امریکا او اسراییلو له خوا پيل شوي بریدونه شپږمې اوونۍ ته داخل شول، خو لا هم د جنګ پای ته رسېدو کومه نښه نه لیدل کېږي.
له یوې خوا د امریکا او اسراییلو هوايي بریدونه په شدت ادامه لري، بله خوا د ایران له خوا سیمه کې پر امریکايي اهدافو او اسراییلو د ډرون الوتکو او توغندویو ګوزارونه ادامه لري.
