اسلامي امارت د پاکستان پوځي رژیم په بریدونو کې د عامو خلکو د مرګ ژوبلې او اوښتو زیاتونو په اړه شمېرې داسې مهال خپروي چې دامهال د کابل او اسلام اباد پلاوي د چین په منځګړیتوب په اورومچي ښار کې په خبرو بوخت دي.
د اسلامي امارت له خوا خپرې شوې شمېرې ښيي چې د روان زېږدیزکال د فبرورۍ له ۲۲ مې نېټې د اپریل تر ۴ مې پورې د پاکستان پوځي رژیم په بریدونو کې له ۷۶۱ تنه ملکي افغان شهیدان او سلګونه نور ژوبل شوي دي.
د خپرو شویو معلوماتو له مخې، د پاکستان پوځي رژیم په تېرو شاوخوا شپږو اوونیو کې د کابل په ګډون د هېواد پر نهو ولایتونو هوايي بریدونه کړي.
د اسلامي امارت مرستیال ویاند حمدالله فطرت وايي: « د پاکستان پوځي رژیم د فبروري له ۲۲ مې د اپرېل تر ۴ مې نېټې پورې د کړو بریدونو او جنګي جنایتونو له امله په هېواد کې ۷۶۱ ملکي وګړي شهیدان او۶۲۶ نور ټپیان شوي دي. له دې سربیره، په دغو بمباریو کې ۳۴ جوماتونه، ۱۳ مدرسې، ۳ روغتیايي مرکزونه،۱۳ ښوونځي،۲۵۶ دوکانونه، ۱ زر۱۴۰ کورونه او ۴۲ موټر ویجاړ شوي او ۶۶۱ څاروي وژل شوي دي. په یاده موده کې د پاکستان پوځ پر افغان خاوره۱۴ زره ۹۷۳ ډیسي توپونه او هوانونه ویشتلي چې له امله یې ۲۷ زره ۴۰۷ کورنۍ له خپلو مېنو بې ځایه شوې دي.»
د پاکستان پوځي رژیم دغو بریدونو کې د ملکي وګړو مرګ ژوبلې د بشري حقوقو د نړیوالو سازمانونو اندېښنې هم را وپارولې دي او په دې ترڅ کې د بښنې نړیوال سازمان د پاکستان له پوځي رژیم څخه د وضاحت غوښتنه کړې.
په همدی حال کې، د ملګرو ملتونو د بشري حقونو کارپوهانو بیا د پاکستان پوځي رژیم دا بریدونه د ملګرو ملتونو له منشور او نړیوالو قوانینو سره په ټکر کې بللي او د ملکي وګړو د مرګ ژوبلې د هرې پېښې په اړه یې د څېړنو غوښتنه کړې.
د بشري حقونو فعالان هم د ملکي وګړو او عامه تاسیساتو په نښه کول غیر قانوني بولي او په دې تړاو د جدي پلټنوغوښتنه کوي.
د بشري حقونو فعال روکای ولیزاده وايي: « د ملکي وګړو او ملکي تاسیساتو هدف ګرځول له ټولو نړیوالو قوانینو او بشري حقونو ښکاره سرغړونه ده. په ځینو حالاتو کې دا ډول بریدونه جنګي جنایت ګڼل کېږي. همدارنګه دغه شان بریدونه د ملکي وګړو او تاسیساتو د خوندیتوب په تړاو د جینوا پروټوکول ټول قوانین تر پښو لاندې کوي. حتا د ډېر جدي جنګي وضعیت پرمهال هم بشري قوانین د جګړې ښکېل اړخونه د دغو اصولو پر رعایت کولو مکلف ګڼي. د پاکستان پوځي رژیم چلن له هېڅ امله د توجیه وړ نه دی؛ تمه لرو چې دا ډول چلن او کړنې هر څومره ژر چې وي، پای ته ورسول شي.»
یو شمېر سیاسي شنونکي بیا د پاکستان پوځي رژیم دا بریدونه د اسلامي امارت لپاره یوه جدي ننګونه بولي او وايي، حکومت دې د ملکي وګړو خوندیتوب لپاره اغېزناک ګامونه پورته کړي.
دوی همدا راز سپارښتنه کوي چې اسلامي امارت دې په سیمه کې د خپلو سیاسي او ډېپلوماټیکو اړیکو ساتلو لپاره مناسبې لارې ولټوي.
د سیاسي چارو شنونکی روح الله هوتک وايي: « امارت د خبرو او ډیالوګ له لارې د ستونزو هوارولو لپاره ژمنتیا ښودلې او باید جدي تعقیب شي. په ورته مهال، د خاورې دفاع پر ټولو افغانانو فرض ده او دا ښکاره خبره ده چې د رد الظلم عملیات مناسب او حساب شوی ځواب دی. زما نظر دا دی چې ستونزه په ډېپلوماټیکو هڅو هغه مهال حل کېدای شي چې په خبرو باور موجود وي. د دې لپاره باید د پوځي رژيم تېری ودرول شي، د خپلو خلکو امنیت خپله تأمین کړي او لامل یې افغانستان ونه بولي.»
اسلامي امارت د پاکستان د هر هغه برید پر وړاندې چې په کې ملکي وګړي په نښه شوي، سخت غبرګون ښودلی او د غچ اخستلو عملیات یې کړي.
له دې ټولو سره، د پاکستان پوځي رژیم له لوري پر ملکي وګړو د بریدونو لړۍ نه ده بنده شوې.
د شنونکو په باور، د دې بریدونو بندولو یوازینۍ لاره پر اسلام اباد د نړیوالو فشارونو راوړل دي. دوی وايي، اسلامي امارت باید نړیوال قانع کړي چې په دې تړاو پر اسلام اباد فشارونه وارد کړي.
