که څه هم له ایران سره د امریکا او اسراییلو د جګړې میاشت پوره شوه، خو لا هم د جګړې د لمنې راټولېدو نښې نه ښکاري.
په دې جګړه کې د دواړو خواوو له خوا په تازه بریدونو کې د یمن حوثیان هم د ایران په پلوۍ د جګړې ډګر ته ننوتل.
په یمن کې حوثي مسوولینو تایید کړې چې له ایران سره د امریکا او اسراییلو د جګړې له پیل راهیسې یې د لومړي ځل لپاره د ايران په پلوۍ پر اسراییلو برید کړی.
د حوثیانو ویاند ویلي، د ایران، لبنان، عراق او فلسطیني سیمو په نښه کولو غبرګون کې یې د اسراییلو حساس پوځي تاسیسات په څو بالېسټیک توغندیو ویشتلي.
د يمن حوثیانو ویاند یحیی سرېع ویلي: « د کروز توغندیو او بې پیلوټه الوتکو یو لړ بریدونه مو کړي چې هدف یې د اسراییلو څو مهم پوځي مرکزونه وو. دا بریدونه خورا بریالي وو او خپل هدفونه مو ترلاسه کړل. تر هغې چې دښمن خپل بریدونه او تېری بند نه کړي، په راتلونکو ورځو کې به نور بریدونه هم ترسره شي.»
د یمن حوثیان دغهراز وایي، عملیات به یې تر هغه وخته دوام ومومي چې په ټولو جبهو کې تېری پای ته ورسېږي. یو شمېر نړیوالو رسنیو لیکلي، د امریکا- اسراییلو او ایران جګړه کې د حوثیانو ورګډېدل به د امریکا پر وړاندې یوه نوې جبهه پرانیزي.
د شنونکو په باور، د امریکا-اسراییلو او ایران جګړه کې د حوثيانو ورګډېدل دا خطر لري چې سره سمندر ته نږدې یوه نوې جګړييزه جبهه پرانستل شي.
پخوانی ډېپلوماټ عزیز معارج وايي: « د ایران، امریکا او اسراییلو جګړه به ادامه ولري، ځکه دا له وړاندې پلان شوې جګړه ده او له دې سره به نړۍ او ځانګړې توګه خلیج کې ځینې تغییرات هم راشي. همدارنګه دا جګړه به د نړۍ په اقتصاد او د نفتو په قوانینو کې هم تغییرات راولي. زما نظر دا دی چې کرار کرار به د ترکیې او عربي هېوادونو او اروپايي ټولنې په ګډون ځینې نور هېوادونه هم ورګډ شي.»
له بلې خوا، د یمن حکومت چې نړیوال رسميت لري، ایران یې تورن کړی چې هېواد یې په شخړو کې ښکېلوي او هغه څه يې غندلي چې د دې حکومت په خبره، ايران غواړي یمن او د منځني ختیځ نور هېوادونه د خپلو وسلهوالو ملېشو په وسيله جګړې ته راکاږي.
په ورته مهال، واشنګټن پوسټ راپور ورکړی چې د امریکا جنګ وزارت «پنټاګون» په ایران کې د څو اوونیو لپاره د ځمکنیو عملیاتو ترسره کولو ته چمتوالی نیسي. راپور کاږي، لا هم روښانه نه ده چې ډونالډ ټرمپ به دا عملیات منظور کړي که نه.
ورځپاڼې لیکلي: « د امریکا دفاع وزارت په ایران کې د څو اوونیو لپاره داسې پلان په پام کې لري او یا چمتو دي چې هلته ځمکني عملیات ترسره کړي. د دې عملیاتو لپاره زرګونه سمندري سرتېري منځني ختیځ ته رسېدلي او دا څه د جګړې خطرناک حالت انځوروي، خو دا لا روښانه نهده چې د ځمکنیو عملیاتو په اړه به ډونالډ ټرمپ منظوري ورکړې او که نه.»
د منځني ختیځ په جګړه کې د حوثيانو ورګډېدل له هرمز تنګي سربېره، اوس سره بحیره کې د باب المندب تنګي تړل کېدو اندېښنې هم زیاتې کړې دي. ایران له دې وړندې هرمز تنګي څخه پر تېرېدونکو ټانکرونو بریدونه کړي او یوازې هغو بېړیو ته د تېرېدو اجازه ورکوي چې د ایران په خبره، په دښمن هېوادونو پورې اړه نه لري.
