په داسې حال کې چې د پاکستان تر کنټرول لاندې پښتنو سیمو کې ځوان مشران هڅه کوي چې د پاکستان د پوځي رژیم د پلانونو پلي کولو په وړاندې پښتانه ولسونه را ویښ کړي، د هېواد یو شمېر شنونکي د دوی هلې ځلې اغېزناکې بولي.
شنونکي وايي، که څه هم د ځوانو پښتنو مشرانو هلې ځلې سوله ییزې دي، خو په پښتنو سیمو کې یې ژورې ريښې غځولې او اغېز یې له ورایه احساسېږي.
د شنونکو په باور، د ځوانانو پښتنو مشرانو هلوځلو ته په کتو وایي، که پاکستان پوځي رژیم د دوی په وړاندې په خپلو سیاستونو کې بدلون را نه ولي، دا هېواد به لا ژور ناورین ته ولوېږي.
د سیاسي چارو شنونکی معین گل څمکنی وايي: « که چېرې پاکستان یوه داسې پالیسي جوړه نه کړي چې له خپلو ټولو ګاونډیانو سره په سوله کې ژوند ولري، په دې صورت کې ښايي پاکستان کې یو ډېر ژور بحران رامنځته او اوسنی نظام یې متزلزل شي. پاکستان اوس مهال په ژور اقتصادي ناورین کې ښکېل دی او په داسې حال کې چې له سعودي عربستان سره سټراټیژيک تړون لري، خو د ایران له خوا پر سعودي عربستان بریدونو ته هېڅ ډول غبرګونه نه ښيي.»
که څه هم پاکستان په کور دننه د شته ستونزو او د دوی د سیاستونو په وړاندې مخالفتونه د پوځي ځواک په کارولو سره حلول غواړي، خو دا ځوان مشران یې پر وړاندې په بې باکۍ سره چلن کوي او د پښتنو پر وړاندې یې سیاستونه ننګوي.
اوس د خیبر پښتونخوا اعلی وزیر سهیل افریدي په بلوچستان کې یوې ولسي غونډې ته په وینا کې په واضېحو ټکو سره د پښتنو پر وړاندې د اسلام اباد چلن وغانده او هغه یې د پښتنو د تباهۍ یوه دسیسه وبله.
د خیبر پښتونخوا اعلی وزیر سهیل افریدي ویلي: « پښتنو! دا تل په یاد ولری چې زموږ کومه خاوره ده له هر ډول مادي او معنوي قدرتونو او زخایرو څخه ډکه ده. ولې د دې خاورې د اوسېدونکو لپاره تحفظ نه شته؟»
سهیل افریدي په ټول قوت سره د اسلام اباد د هغو پرېکړو په وړاندې د بغاوت اعلان وکړ چې د ده په وینا د بندو دروازو ترشا کېږي.
سهیل افریدي دا هم وویل چې اوس په پښتنو کې داسې کسان پيدا شوي چې د چا بدمعاشي نه مني او له اسلام اباد سره پر پښتنو د کېدونکو ظلمونو حساب کولو وړتیا لري.
خلیل احمد نادم د دغو مشرانو د هڅو په وړاندې د پاکستان د پوځي رژیم له خوا موانعو رامنځته کولو ته په اشارې وايي، د دوی پر وړاندې د اسلام اباد د زور او ظلم کارولو سربېره، دوی د محکومو پښتنو د حقوقو خوندي کولو لپاره خپلو مبارزو ته دوام ورکوي.
دی په خپلو خبرو کې د پښتون ژغورنې غورځنګ هلوځلو ته په اشارې وايي، دا غورځنګ په نړیواله کچه د پښتنو حقوقو لپاره کار کوي او هلې ځلې یې مشروع دي.
د چارو شنونکی خلیل احمد نادم وايي: « خلک نور د پنجاب له ظلمونو ستړي شوي او پر وړاندې یې مبارزې ته لاس اچولی. زه فکر کوم د دوی مبارزه په حقه ده او بالاخره به بریا ته رسېږي. د پښتون ژغورنې غورځنګ په یوه نړیوال جریان بدل شوی او په ټوله نړۍ کې استازولۍ لري او د مظلومو پښتنو غږ تر نړۍ رسوي.»
د پاکستان تر کنټرول لاندې سیمو کې د ځوانو پښتنو مشرانو د هڅو په اړه دا څرګندونې داسې مهال کېږي چې د اکثریت شنونکو په باور، د پاکستان له جوړېدو راهیسې د پښتنو پر وړاندې د اسلام اباد چلن له تربګنۍ ډک دی.
د پښتنو اکثریت مشران که ځوانان دي او که زاړه، ټول په یوه خوله په قبایلي سیمو کې د پوځي رژیم له خوا روان پوځي عملیات د پښتنو په ضد د دسیسو یوه برخه بولي او بنسټیزه موخه یې د پښتنو سیمو د معدنونو کنټرول لاس کې اخستل ګڼي.
