د ننګرها اوسېدونکي کابل کې د معتادینو د درملنې پر مرکز د پاکستان پوځي رژیم له برید وروسته چې سلګونه ناروغان په کې شهیدان او ټپیان شول وایي، دا بریدونه نه یوازې د نړیوالو اصولو خلاف عمل دی بلکې یو بشري ناورین هم بلل کېږي.
د دوی په خبره، د پوځي رژيم دا ډول بریدونه باید نه یوازې ونه زغمل شي بلکې مخه یې هم ونیول شي.
د ننګرهار اوسېدونکی زلمی وايي: « پاکستان زموږ آبادي او سوکالي نه شي لیدلی او غواړي موږ تل کمزوري او دوی ته محتاج اوسو.»
د ننګرهار اوسېدونکی محمد طارق وايي: « د پاکستان دا عمل له ټولو اسلامي، ګاونډیتوب او نړیوالو اصولو خلاف کار دی. موږ دا عمل غندو او له اسلامي امارت غواړو چې د خپلو خلکو پوښتنه وکړي.»
ننګرهار مېشتي له اسلامي امارته غواړي چې د پاکستان پوځي رژیم پر وړاندې له دفاعي حالته ووځي او تهاجمي حالت خپل کړي. د دوی په خبره، د ورته بریدونو د تکرار مخنیوي لپاره باید عملي او جدي ګامونه پورته شي.
د ننګرهار اوسېدونکی هجرت الله وايي: « دوی پر ملکي روغتون برید کړی او ناروغان یې شهیدان کړي. موږ پر دولت غږ کوو چې نور له دفاعي حالت ووځي او تهاجمي حالت خپل کړي.»
د ننګرهار اوسېدونکی زمری وايي: « د پاکستان او اسراییلو هېڅ توپير نه شته. اسراییلو په فلسطین کې پر روغتونونو بریدونه وکړل او پاکستان په افغانستان کې.»
ننګرهار مېشتي همداراز ټینګار کوي چې له افغان امنیتي او دفاعي ځواکونو بشپړ ملاتړ کوي او که اړتیا شي، د هېواد دفاع لپاره چمتو دي.
د ننګرهار اوسېدونکی کامران وايي: « موږ له پاکستان سره جګړه کې د اسلامي امارت ترڅنګ ولاړ یو او هر ډول قربانۍ ته چمتو یو. وطن پر موږ حق لري او حق په قربانۍ اداء کېږي.»
د ننګرهار اوسېدونکی خمار وايي: « زه په تېر حکومت کې سرتېری پاتې شوی یم او پوره تجربه لرم. که اړتیا شوه د هېواد او خاورې د دفاع لپاره له اسلامي امارت سره اوږه په اوږه درېږم.»
له ننګرهار سربېره د هېواد ټولو ولایتونو کې پر روغتون د پوځي رژیم بریدونه له سختو غبرګونونو سره مخ شول.
د بلخ ولایت خلکو هم له اسلامي امارت د پاکستان ضد جهاد اعلانولو غوښتنه کړې او وايي، د هېواد دفاع لپاره سرښندونو ته تیار دي.
دغه راز، د هرات ولایت اوسېدونکي وايي، پاکستان په قصدي ډول ملکي وګړي په نښه کوي او له همدې امله باید نړیوالې جزايي محکمې ته کش شي.
د کابل ښار نهمې امنیتي حوزې اړوند سیمه کې د معتادینو درملنې پر روغتون د پاکستان پوځي رژیم برید کې لږترلږه د ۴۰۰ کسانو شهادت او له ۲۵۰ ډېرو ژوبلېدل تایید شوي دي.
