د کډوالو په چارو کې د ملګرو ملتونو عالي کمېشنري وايي، یوازې په ۲۰۲۵ زېږدیز کال یې له ۵۰۰ زرو څخه ډېرو راستنو کړای شویو افغانانو سره مرستې کړې.
یادې ادارې ویلي، په ۲۰۲۵ کال کې يې له ۷۸ زره زیاتو ښځو او نجونو لپاره د خوندیتوب اقدامات ترسره کړي او دغه راز یې په ټولو ولایتونو کې له ۵۷ زره زیات کسان د څار ارزونه کړې.
د کډوالو په چارو کې د ملګرو ملتونو عالي کمېشنري وايي: « یو اېن اېچ سي آر په ۲۰۲۵ زېږدیز کال کې د ۵۰۰ زره راستنو کړای شویو لپاره د هرکلي مرستې کړې. له ۷۸ زره زیاتې ښځې او نجونو د خوندیتوب ګامونه یې اخیستي او دغه راز په ۳۴ ولایتونو کې یې له ۵۷ زره زیات کسانو د څار ارزونه کړې چې ټولنیز خوندیتوب ورسره پیاوړی شو.»
له دې سره هممهاله، د ملګرو ملتونو سرمنشي د روژې په مناسب خپل پیغام کې د یو شمېر اسلامي هېوادونو د وګړو بشري وضعیت ناوړه بللی.
نوموړي ويلي، له افغانستان څخه تر یمن او له غزې تر سوډان پورې خلک لوږې، بې ځایه کېدو او جګړو سخت ځپلي او نړیواله ټولنه باید ورسره د انساني خواخوږۍ او روژې میاشتې په مناسبت خپلې مرستې ونه سپموي.
د ملګرو ملتونو سرمنشي انټونیو ګوټېرېش ویلي: « په داسې حال کې چې نړۍ له وېش او اختلافونو سره مخ ده، راځئ د روژې د تلپاتې پیغام درناوی وکړو، اختلافونه کم کړو او له هغو خلکو سره مرسته وکړو چې ستونزې زغمي. د هر انسان کرامت او حقونه باید خوندي کړو، له افغانستان څخه تر یمن او له غزې څخه تر سوډان پورې ناوړه جګړو، لوږې او بېځایه کېدو خلک سخت اغېزمن کړي دي.»
بله خوا شنونکي وايي، اوسمهال په افغانستان کې د ملګرو ملتونو اړوند ادارو له لارې د نړیوالې ټولنې بشري مرستې حیاتي ارزښت لري، خو د دوی په خبره، د دې مرستو محدودیت له امله میلیونونه افغانان په مستقیم ډول اغېزمن شوي دي.
د اقتصادي چارو شنونکی نور الله عزیز وايي: « دا چې بشري مرستې په کمېدو او په ځینو حالاتو کې په درېدو شوې، دغې چارې د خلکو پر ژوند اغېز درلود، د خلکو د بېکارۍ کچه لوړه شوه، په ماشومانو کې خوارځواکي او د ښځو په ژوند کې یې هم فوق العاده منفي تأثیرات لرل. که دا لړۍ په هره بڼه وي او دوام ولري، زما په اند کولی شي د ډېرو خلکو لپاره د ژوند سهولتونه چمتو کړي او مثبت اغېز ولري. لازمه ده چې امریکا او نړیواله ټولنه په دې برخه کې همکار پاتې شي.»
د ملګرو ملتونو د راپورونو پر بنسټ، افغانستان کې شاوخوا ۲۳ میلیون خلک بشري مرستو ته اړ دي چې له ډلې یې نږدې ۱۶ میلیونه په بېړني وضعیت کې دي.
اسلامي امارت په کراتو ویلي چې نړیواله ټولنه دې بشري مرستې له سیاست سره نه تړي او له افغانانو سره دې د دوی ناسم بشري وضعیت په ښه کولو کې همکاري نه محدودوي.
