د شدیدې یخنۍ زغمل، قوي اراده او نه ماتېدونکی هوډ؛ په داسې حال کې چې ډېری خلک د ژمي له سړې هوا څخه ځان ساتي، خو غور ولایت کې د رقیب فاروقي په نوم یو داسې ځوان هم شته چې د سختې سړې هوا او واورو په منځ کې د ځانګړو نمایشي حرکتونو په ترسره کولو سره شهرت موندلی.
فاروقي وایي، د یخ او سختې سړې هوا په منځ کې د نمایشي حرکاتو سره یې مینه له څو کلونو راهیسې پیدا شوې ده. نوموړی زیاتوي، په ۱۳۹۹ لمریز کال کې یې د لومړي ځل لپاره دا ځانګړی ورزش ترسره کړ او له هماغه وخته یې هڅه پیل کړې چې یاد ورزش د المپیک په نړیوالو سیالیو کې د افغانستان په نوم ثبت کړي.
ورزشکار رقیب فاروقي وايي: « د هریرورد په یخ وهلو اوبو کې له دې ډول حرکتونو څخه موخه د المپیک په کچه د فري سټایل ورزش ثبتونه ده. ما دغه څانګه په غور ولایت کې رامنځته کړه او غواړم د المپیک له خوا رسماً ثبت شي.»
ورزش یوازي د تفرېح او نمایشونو ترسره کول نه دي، بلکې د ټولنې د یووالي، ورورولۍ او مینې پیاوړې وسیله ده. د غور ولایت ورزشکاران وایي، هڅه کوي چې د ورزشي فعالیتونو له لاري ځوانان سالمو بوختیاوو ته را جذب او له نشهیي توکو او ناوړه کړنو څخه لري وساتي.
ورزشکار عبدالقاسم فردوسي وايي:« د غور ولایت ورزشکاران د امکاناتو او اسانتیاوو نه لرلو سربېره داسې حرکتونه ترسره کوي چې مثال یې په ټوله نړۍ کې نه دی لیدل شوی. موږ له مسوولو چارواکو غواړو چې د ورزشکارانو ملاتړ وکړي، مالي او معنوي لاسنیوی یې وکړي. زموږ ورزشکاران تل هڅه کوي د غور محرومیتونه تر چارواکو ورسوي.»
ورزشکار میراحمد معنوي وايي: « موږ له فاروقي صاحب سره فري سټایل ورزش د دې لپاره کوو چې ځوانان سپورټ ته مخه کړي او له نشه يي توکو لرې شي. همدارنګه له مهاجریت څخه ډډه وکړي او سپورټي لوبو ته راشي. په اوسنیو شرایطو کې یوازې ورزش دی چې ځوانان له ژور خفګان او نورو ناروغیو څخه ژغورلی شي.»
بله خوا، د غور اوسېدونکي له ورزشکارانو څخه پرملاتړ ټینګار کوي او له اړوند مسوولینو هم غواړي چې ورزشکارانو ته اړین امکانات او اسانتیاوي برابرې کړي.
د غور اوسېدونکی محمد کوهستاني وايي: « له حکومت څخه زموږ غوښتنه دا ده چې زموږ له ورزشکارانو ملاتړ وکړي. که زموږ ملاتړ وشي، نور ځوانان به هم دغې لوبې ته مخه کړي او له نشه يي توکو به لرې شي.»
رقیب فاروقي په داسي حال کې تر منفي ۲۲ درجې سړې هوا کې د ورزشي نمایشونو ترسره کولو سره د فري سټایل سپورت په نوم ورزش بنسټ ایښی چې په خبره یې تر اوسه د هېڅ روزونکي له خوا ورته روزنه نه ده ورکړل شوې.
