د المپیک او بدني روزنې ملي کمېټې په یوه جوړ کړي کنفرانس کې د ۱۴۰۴ زېږدیز کال ملي ټيمونو لوبغاړو ته د عصريي ورکولو لړۍ پیل کړه.
د دې کمېټې مسوولان وايي، د هېواد په کچه به د ملي ټیمونو لوبغاړو ته د شاوخوا۵۰ میلیونو افغانیو په ارزښت عصریه ووېشل شي چې دا مرستې به د مسوولانو په خبره له ۳۵۰۰ څخه زیاتو لوبغاړو ته چې د بېلابېلو لوبډلو استازولي کوي، ورکړل شي. چارواکي ټینګار کوي چې د لوبغاړو لپاره د اسانتیاوو برابرول او ملاتړ یې له اساسي ژمنو څخه دي.
د کمېټې مسوولانو په دې کنفرانس کې خپل کاري فعالیتونه او لاسته راوړنې تشرېح کړل او ډاډ یې ورکړ چې د لوبغاړو ملاتړ ورته لومړیتوب لري.
د کمېټې تخنیکي او مسلکي مرستیال محمد جان ځدراڼ وايي: « زموږ اداره او دغه راز د اسلامي امارت حکومت د ورزشکارانو ملاتړ کوي. په دې ملاتړ کې مادي، معنوي، هڅول او حوصلې ډېرول شامل دي. موږ به د خپلو ورزشکارانو ملاتړ کوو او تر شا به یې درېږو.»
نوموړی د خپلو خبرو پرمهال وايي، کمېټه هڅه کوي چې په بېلابېلو ورزشي برخو کې افغان لوبغاړو ته لازمې اسانتیاوې برابرې او د هغوی ملاتړ ته دوام ورکړي.
همدارنګه، د دعوت او ارشاد رییس دادمحمد بریا وايي، د عصریې په وېش کې عدالت په پام کې نیول شوی او هڅه کېږي چې دغه مالي ملاتړ به تر مستحقو کسانو ورسول شي.
د المپیک ملي کمېټې د دعوت او ارشاد رییس داد محمد بریا وايي: « د دغو ورزشکارانو شمېر ۳ زره ۵۶۸ کسان دي او دوی ته به عصریه ورکول کېږي او له نن څخه به پيل شي. د دغو ورزشکارانو لپاره ۵۰ میلیونه افغانۍ ځانګړې شوې دي.»
بله خوا، لوبغاړي د برابر شویو اسانتیاوو څخه خوښي ښيي او له حکومت غواړي چې په ټولو برخو او بهرنیو لوبو کې د لوبېدو فرصتونه ورته چمتو کړي.
لوبغاړی احسان وايي: « موږ له حکومت راضي یو او په دې وروستیو کې زموږ عصریه راکوي. همدارنګه له موږ سره یې د وروستیو لوبو پرمهال هم ملاتړ کړی.»
لوبغاړی محمد داوود وايي: « حکومت موږ ته د هېواد په داخل کې د لوبو فرصت برابر کړی، خو موږ غوښتنه کوو چې له هېواد څخه بهر هم د لوبو فرصت برابر کړي.»
د یادونې وړ ده چې په دې کنفرانس کې هر لوبغاړي ته ۱۳ زره ۲۰۰ افغانۍ ورکړل شوې او له هغوی وغوښتل شول چې لا زیاتې هڅې وکړي او افغانستان ته لا ډېر ویاړونه ور په برخه کړي.
