د کرېکټ ملي لوبډلې د نړیوال شل اوریز جام په ګروپي سیالیو کې خپله دویمه لوبه د سویلې افریقا لوبډلې ته وبایله.
افغان لوبډلمشر د لوبې پچه وګټله او د سوېلي فریقا لوبډله یې توب وهنې ته راوبله چې په ټاکل شویو ۲۰ اورونو کې يې د شپږ لوبغاړو په سوځېدو سره ۱۸۸ منډو هدف ټاکه. که هم څه افغان توب اچوونکو د سوېلي افریقا لوبډلمشر ایډین مارکرم له مخې ژر پورته کړ، خو کیونټین ډیکوک او ریان ریکیلټون هغه دوه لوبغاړي وو چې په کمو توپونو یې پنځوسیزې پوره کړې او ملګرتیا یې له سل منډو وغځېده او په پایله کې یې افغان لوبغاړو ته کار سخت کړ.
په افغان توپ اچوونکو کې عظمت الله عمرزي درې، راشد خان دوه او فضل الحق فاروقي یوه وېکټ ترلاسه کړه.
له رحمنالله ګربز پرته چې په فردي ډول یې ۸۴ منډې جوړې کړې، نور ټول افغان لوبغاړي یوځل بیا په توب وهنه کې ښه ونه ځلېدل او په دې توګه افغان لوبغاړو د سوېلي افریقا له لوري ورکړل شوی هدف پوره نه کړای شو.
د لوبې په حساس وخت کې نور احمد لکڼوال د دوو شپږیزو په مټ له سوېلي افریقا سره د افغانستان منډې برابرې کړې او لوبه سوپر اور ته لاړ. دغه سوپر اور چې افغان لوبغاړو په کې ۱۷ منډې جوړې کړې، بیا هم مساوي شو او لوبه دویم سوپر اور ته لاړه. په دویم سوپر اور کې سوېلي افرېقا ۲۳ منډې وکړې او افغان لوبغاړي یې په پوره کولو کې پاتې راغلل. په دې توګه د کرېکټ نړیوال شل اوریزجام د ګروپي لوبو دغه برخلیک ټاکوونکې لوبه د سوېلي افریقا لوبډلې وګټله.
د افغانستان کرکټ بورډ ویاند سید نسیم سادات وايي: « که څه هم په دې سیالۍ کې بریا سوېلي افریقا ترلاسه کړه، خو په ټوله کې سخته لوبه مقابله وشوه او افغان لوبډلې په هره برخه کې ښه کارکردګي وکړه.»
د افغانستان کرکټ بورډ پخوانی رییس شهزاده مسعود وايي: « ډېره په زړه پورې او هیجاني لوبه وشوه، په لوبو کې ګټل او بایلل وي مګر د ښې لوبې کول په کار دي. د لوبې په ګټلو خفه یو، خو موږ باید هم د ګټلو حوصله ولرو او هم د بایللو او خپل اتلان تشویق کړو.»
پر سوېلي افریقا د دې لوبې په بایللو سره په روان نړیوال شل اوریز جام کې د افغان کرېکټ لوبډلې مخکې تګ له ستونزو سره مخ شو او یوازې دوه نورې لوبې چې یوه یې له کاناډا او بله یې هم له متحده عربي اماراتو سره ده، ور پاتې دي.
د کرکټ څارونکی عبدالمالک شینواری وايي: « د ۲۰۲۶ کال په نړیوال جام کې د افغانستان دویمې لوبې بایللو ته په کتو، فکر نه کوم چې لوبډه د وړاندې تګ چانس ولري. د نیوزیلنډ او سوېلي افریقا ټیمونو ته په کتو، داسې ښکاري چې همدا دوه ټیمونه به سوپر اته پړاو ته ووځي.»
د افغانستان کرېکټ بورډ وايي، که څه هم افغان لوبډلې سیالي وبایله، خو د کرېکټ د نړیوالو جامونو تر ټولو له احساساتو او هیجان ډګه لوبه يې نندارې ته وړاندې کړه چې د کرېکټ داخلي او بهرني مینوال به یې کلونه کلونه په یاد ساتي.
د افغانستان کرېکټ بورډ ویاند سید نسیم سادات وايي: « دا ښکاره خبره ده چې په لوبو کې به یوه لوبډله حتمن بریا ترلاسه کوي، خو دا لوبه زموږ لپاره له هیجان ډکه لوبه وه او نه یوازې افغانان بلکې د نړۍ کرېکټ مینه وال به یې یاده ساتي. هیله لرو زموږ اتلان په راتلونکو لوبو کې بریاوې ترلاسه کړي.»
په روان شل اوریز نړیوال جام کې شل لوبډلې شاملې دي چې په څلورو ګروپونو وېشل شوې او د هر ګروپ دوه مخکښې لوبډلې به سوپر۸ یا کواټر فاینل پړاو ته لار مومي. افغانستان سره په ګروپ کې نیوزیلڼد، سوېلي افریقا، متحده عربي امارات او کاناډ لوبډلې شاملې دي. نیوزیلنډ او سوېلي افریقا دوه دوه لوبې ګټلې او کواټر فاینل ته یې تګ څه نا څه یقیني شوی دی.
