که څه هم د دوشنبې شپې زورورې زلزلې په بدخشان کې ځاني زيانونه نه دي اړولي، خو ځايي مسوولان وايي چې ډېر مالي زيانونه يې پرځای پرې اېښې دي.
د دوی په خبره، د زلزلې له امله د شهر بزرګ ولسوالۍ په ځينو کليو کې شاوخوا ۸ سوه کورونه ویجاړ شوي او زياتوي چې په يادو کليو کې د کورونو له ویجاړېدو وروسته، زيانمنې کورنۍ په خېمو کې مېشت شوې او د سرپناه له جدي ستونزو سره مخ دي.
د بدخشان امنيه قومندانۍ وياند احسانالله کامګار وايي: « د تېرې شپې زلزلې په بدخشان ولایت کې ځاني تلفات نه لرل، خو خلکو ته یې درانه مالي زیانونه اړولي دي. دغه زیانونه تر ډېره د شهربزرګ ولسوالۍ په چوګاني کلي کې اوښتي دي. په اټکلي توګه ویلی شم چې شاوخوا ۸۰۰ کورونه ویجاړ شوي او هغه کورنۍ چې په دې کورونو کې یې ژوند کاوه، اوس تر شنه اسمان لاندې په خېمو کې پرتې دي.»
دا په داسې حال کې ده چې د بدخشان په ګډون د هېواد په یو شمېر ولایتونو کې د سړې هوا او ورښتونو څپه راغلې او ښايي د درنو ورښتونو کوربه شي.
