د کورنیو چارو وزارت چارواکي وايي، د هرات – کندهار لویې لارې په اوږدو کې د ټرافیکي پېښې له کبله ۷۹ تنو ژوند له لاسه ورکړی.
د دغه وزارت ویاند په یوه استول شوي غږیز پیغام کې ویلي، په دې پېښه کې دوه تنه نور ژوبل شوي هم دي.
د مفتي عبدالمتین قانع په خبره، د ژوبلو شویو کسانو له ډلې یو په کوما حالت کې دی او بل یو برسېرن ټپي دی.
قانع زیاتوي: « په ډېرې خواشینۍ سره باید ووایم چې په دې زړه بوږنوونکې پېښه کې زموږ ۷۹ تنو هېوادوالو ژوند بایللی، دوه تنه ټپیان دي چې یو یې د کوما په حالت کې دی او بل یې سطحي ژوبل دی. کورنیو چارو وزارت د دې پېښې له داغداره کورنیو سره خپله غمرازي ښيي، مړو شویو ته جنت او ژوبلو شویو ته عاجله شفا غواړي.»
د هرات یوه ځایي چارواکي محمد یوسف سعیدي اې اېف پي خبري اژانس ته ویلي، د پېښې ښکار شوي بس ګاډي کې سپاره ټول له ایران راستانه شوي کډوال وو.
هرات پولیس وايي، پېښه د بس چلوونکي د خورا زیات سرعت او بې پروايۍ له کبله رامنځته شوې.
په افغانستان کې معمولاً خونړۍ ټرافیکي پېښې د ویجاړو سړکونو او ټرافیکي قوانینو نه عملي کېدو له کبله رامنځته کېږي.
ځایي مسوولینو ويلي، يو لوی ۵۸۰ ډوله بس موټر چې له ایرانه راستانه شوي کډوال يې لېږدول، له يوه موټر سایکل او له هغه وروسته له يوه بل مازدا ډوله تېل لېږدونکي موټر سره ټکر شوی او دغه مرګونې پېښه یې رامنځته کړې ده.
د ۲۰۷ الفاروق قول اردو سرطبیب حاجي محمد جانان مقدس وايي: « په دې پېښه کې یو موټرسایکل، یوه په تېلو بار مازدا ډوله لارۍ او یو ۵۸۰ ډوله بس موټر ټکر شوي. په بس موټر کې ټولټال ۷۶ کسان سپاره وو چې ۳ تنه یې عمله وه او ۷۳ تنه هم مسافر وو. په دې سپرلیو کې ۱۷ تنه ماشومان او ۵۹ تنه هم د ښځو په ګډون لویان وو.»
اسلامي امارت د یوې اعلامیې په خپرولو سره د هرات د “دردونکې” ټرافیکي پېښې په اړه خواشیني څرګنده کړې.
په دې اعلامیه کې له ټرانسپورټي مسوولینو غوښتل شوي چې د پېښې په اړه دې کره مالومات وړاندې کړي.
د اعلامیې یوه برخه: « اسلامي امارت د دغې دردونکې پېښې له امله د الله (ج) څخه د ټولو شهیدانو لپاره جنت الفردوس، ټپیانو ته عاجله شفا او کورنیو ته یې جمیل صبر غواړي. ټرانسپورټي مسوولینو ته لارښونه کوو چې هرڅه ژر د پېښې دقیق مالومات وکړي او د ملامت اړخ په اړه خپل مالومات شریک کړي.»
د هرات چارواکي وايي، په دې بس کې له ايرانه تازه راستانه شوي کډوال کابل او شاخوا ولايتونو ته لېږدول کېدل چې ډېری يې د کابل، کاپيسا، پروان او باميانو ولايتونو دي.
د دې لویې ټرافیکي پېښې په تړاو په کور دننه او بهر ګڼ غبرګونونه ښودل شوي دي.
د کډوالو چارو وزارت هم د پېښې په تړاو ژوره اندېښنه څرګنده کړې.
دې وزارت د يوې خبرپاڼې په خپرولو سره له اړوندو بنسټونو او ادارو غوښتي چې د انساني مسوولیت له مخې د پېښې د قربانیانو او ټپیانو له کورنیو سره مرسته وکړي.
پخواني ولسشمر حامد کرزي او اروپایي ټولنې هم د یادې ټرافیکي پیښې په تړاو اندېښنه ښودلې ده.
په افغانستان کې ډېر کله مرګونې ټرافيکې پېښې رامنځته کېږي چې د موټر چلوونکو د بې احتیاطۍ په ګډون غیرقانوني مخته کېدنه، ډېر سرعت، د مخدره توکو کارول او د موټر چلولو پرمهال د ګرځنده ټلیفونونو کارول د دې پیښو اصلي عوامل بلل شوي دي.
له دې سره، د سړکونو خراب حالت، د کافي ټرافیکي نښو نه شتوالی او د ټرافیکي قوانینو نه مراعات کول د دې پېښو په زیاتوالي کې د پام وړ رول لوبوي.
په تېرو کلونو کې هم د افغانستان روغتیا وزارت په کلنیو ارزونکو رپوټونو کې ویلي وو چې تر جګړو وروسته، ډېره لوړه مرګ ژوبله د ټرافیکي پېښو ده.
اوس چې جګړه نه شته، نو تر ټولو لوړه مرګ ژوبله ښايي د ټرافیکې پېښو وي.
