ډایر ولف چې شاوخوا ۱۰ زره کاله وړاندې يې نسل ژوندی و، د اوسنيو لېوانو چې خړ لېوان يې بولي، له نږدې خپلوانو ګڼل کېږي.
خو ډاير ولف د اوسنيو لېوانو پرتله څو برابره پیاوړی، لوی او د وزن له پلوه دروند و.
دغو لېوانو د کنګل په زمانه ژوند کاوه او ډېر وخت د شمالي امریکا په ځنګلونو، دښتو او غارونو کې اوسېدل.
تازه د کولوسل بایوسینز امریکایي شرکت ډایر ولف لېوانو ته منسوب ۱۳.۰۰۰ کلن غاښ او د غوږ له ۲۷.۰۰۰ کلن هډوکي ډي اېن اې استخراج کړې او بیا یې د خړ لېوه یا ګرې ولف جینونه ترې ترمیم کړي، ترڅو د سپین لېوه یا ډایر ولف ځانګړتیاوې ولري.
د کولوسل بایوسینز شرکت ډاکټرانو ویلي: « موږ د خړ لېوه جینونه را واخیستل. د خړ لېوه یوه حجره چې له مخکې نه ډایر لېوه سره ۹۹.۵ سلنه جنتیکي ورته والی درلود او موږ د هغې حجرې دننه د ډي.اېن.اې په بېلابېلو برخو کې د ډایر لېوه نسخه ور زیاته کړه. دا حیوان د ډایر لېوه په څېر ښکاري، د ډایر لېوه په څېر چلن کوي او دا یو ډایر لېوه دی.»
د یاد شرکت څېړونکي وایي، ایکو سیسټم یا د طبیعي چاپېریال ژوندي موجودات له یو بل سره نږدې اړیکې او ډېر ورته والی لري او په دې اساس وايي دا د پخواني رښتیني ډایر ولف نسل دی.
د کولوسل بایوسینز شرکت څېړونکي زیاتوي: « ايکو سیسټمونه یا طبیعي چاپېریال ډېر ظریف او نازک توازن لري او طبیعت زموږ د انسانانو د درک له وړتیا ډېر زیات پېچلی دی، تر څو موږ یې په بشپړ ډول درک کړو یا د ټولو احتمالي نه لیدل شویو پایلو وړاندوینه وکړای شو.»
سره له دې هم ځینې کارپوهان استدلال کوي چې د یاد شرکت له لوري د اصلي ډایر ولف د نسل ژوندي کولو ادعا ناسمه ده.
دوی وایي، دا یوازې جنتیکي ترمیم شوی خړ لېوه دی او ټینګار کوي چې د ډایر ولف او خړ لېوه د نسلونو ژوند ترمنځ میلیونونه کاله جلاوالی شته او یوازې د څو جینونو يو ځای کول کافي نه دي چې له مخې یې د یوه منقرض شوي نسل د بېرته را ژوندي کولو ادعا وشي.
د بارسلونا پوهنتون جنټیک پوهنې استاده جیمه مارفاني وايي: « هغوی منقرض شوی حیوان بېرته نه دی را ژوندی کړی؛ بلکې د هغه نږدې خپلوان یانې خړ لېوه د ډي.اېن.اې پر بنسټ یې یوه نقلي کاپي جوړه کړې ده».
کولوسل بایوسینز شرکت بیا د ډایر ولف په بڼه د رامنځته شوي نوي نسل دوو لېوانو ته د رومولوس او ریموس نومونه ورکړي او ادعا کوي چې د دې کوچنیو لېوانو ټول خاصیتونه د لویو لېوانو د پخواني نسل له خاصيتونو سره ورته والی لري.
یاد شرکت همدا راز وایي، هڅه کوي چې د څېړنو په مرسته د لویو فیلانو، د اوولسمې پېړۍ د ډوډو مارغانو او تاسمانیایي پړانګ په څېر د نورو منقرض شویو حیواناتو نسلونه هم بېرته را ژوندي کړي.
