د اسلامي امارت له بیا واکمنېدو نږدې څلور کاله تېريږي، خو تراوسه هېڅ کوم هېواد پر رسميت نه دی پیژندلی او له سياسي انزوا سره مخ دی.
خو د اسلامي امارت مرستیال ویاند حمد الله فطرت له شمشاد سره مرکه کې وايي، د نړیوالو محدویتونو په شتون کې د نړۍ له هېوادونو سره د اسلامي امارت اړیکې پراخه شوي او له ورته نورو هېوادونو هم غواړي چې له اسلامي امارت سره تعامل وکړي.
فطرت په دې اړه وايي: « په دې لحاظ موږ په سیاسي انزوا کې قرار نه لرو بلکې له ټولو هېوداونو او په ځانګړې توګه د سیمې او ګاونډیو هېوادونو سره ښه تعاملات لرو، خو داسې په اعلان شوې بڼه موږ پر رسمیت نه یو پېژندل شوي، دا یوه بېله خبره ده؛ ځکه ځینې هېوادونه به خپل ملاحظات لري او ځینې به بیا بهانې لټوي. دا کار د هېچا پر ګټه نه دی او ټولو هېوادونو ته مهمه ده چې له اسلامي امارت سره تعامل ته راوړاندې شي.»
فطرت دغه راز زیاتوي، سرپرست حکومت ته په واشنګټن کې د افغانستان سفارت د سپارلو او په کابل کې د امریکا سفارت د بیا پرانیستلو په اړه کابل ته د امریکا له راغلي پلاوي سره مذاکرات شوي او په دې برخه کې د واشنګټن د مثبت ځواب انتظار کېږي.
فطرت په دې اړه وايي: « د افغانستان او امریکا متحده ایالتونو ترمنځ د روابطو عادي کولو لپاره په بېلابېلو مجلسونو کې خبرې شوې چې له ډلې یې یوه هم د بندیانو موضوع وه او په دې برخه کې پرمختګ هم شته او تمه لرو چې نورو موضوعاتو کې هم پرمختګ ولرو.»
فطرت له شمشاد سره مرکه کې له افغانستانه د پوځي تجهیزاتو د بېرته اخیستلو په هکله د امریکا د ولسمشر څرګندونې احساساتي بولي.
فطرت د ډونالډ ټرمپ د دغې ادعا له ردولو سره چې ګواکي بګرام هوايي اډه د چین په واک کې ده وايي، د امریکا ولسمشر له مالوماتي خلا سره مخ دی.
د اسلامي امارت مرستیال ویاند زیاتوي: « بګرام د افغانستان اسلامي امارت په کنټرول کې دی او دا ادعاوې ناسمې دي چې ګوندې بګرام د نورو هېوادونو په واک کې دی. افغانستان کې د بهرنیو هېوادونو هېڅ یو نظامي کس شتون نه لري.»
دا په داسې حال کې ده چې څو ورځې وړاندې د اسلامي امارت ویاند ذبیح الله مجاهد یوې عربي خبري شبکې سره مرکه کې ټینګار کړی چې هېڅ دوښمني تلپاتې نه ده او د اسلامي امارت حکومت له امریکا سره هم ابدي دوښمني نه لري.
نوموړي ټینګار کړی چې امریکا سره د دوحې له تړون وروسته د اسلامي امارت دریځ بدل شوی او ټولې نړۍ سره سیاسي، اقتصادي او سوداګریزې اړیکې غواړي.
