د افغانستان په رسنیز ډګر کې د شمشاد ټلویزیون ۱۹ کلن او د شمشاد راډیو ۱۴ کلن مزل له لاسته راوړونو او له ننګونو مخ و.
شمشاد ټلویزیون له نن ۱۹ کاله وړاندې د ۲۰۰۶ زېږدیز کال د فبرورۍ پر ۱۶ مه خپرونې پيل کړې.
د دې رسنۍ بنسټ اېښودونکی الحاج فضل کریم فضل د شمشاد راډیو ټلویزیون د تأسیس موخه د ملي او دیني ارزښتونو پالل او د افغانانو د یوالي ساتلو لپاره د خلکو فکر جوړونه بولي.
د شمشاد راډیو ټلوېزیون مؤسس فضل کریم فضل وايي:« شمشاد همیشه کوشش کړی چې د خپلو هېوادوالو د ستونزو او مشکلاتو آواز نړۍ سره شریک کړي. شمشاد نه یوازې یوه رسنۍ بلکې یو فکر دی.»
شمشاد داسې مهال رسنیز فعالیت پیل کړ چې هېواد کې څو محدودې خصوصي رسنۍ فعاله وې، خو شمشاد په افغانستان کې لومړنی ټلویزیون و چې پر پښتو ژبه یې خبرونه، دیني، کلتوري، ښوونیزې، تفریحي، ټولنیزې او ادبي خپرونې پیل کړې.
د شمشاد راډیو ټلویزیون د ځینو همکارانو په خبره، په رسنیز ډګر کې د نورو مسوولیتونو سربېره اکاډمیک کار هم کړی او په نږدې دوه لسزیزو کې یې ګڼ شمېر ځوانان په مسلکي توګه روزلي دي.
د شمشاد ټلویزیون د خپرونو او نشراتو مدیر نجیب الله انورزوی وايي: « که څه هم دغه مزل ډېرې لوړې او ژورې درلودلې، خو له یوه ډېر اوږد مزل تر دې ځایه رسېدلي یو. دا د هغو شاوخوا ۲۰۰۰ ځوانانو قربانۍ او زحمتونه وو چې په مستقیم او غیر مستقیم ډول یې له شمشاد سره کار کړی. د افغانستان له ځمکنۍ بشپړتیا دفاع، د ملي رسالت وړاندې کول او د ژورنالېزم له اصولو سره سم خلکو ته پر وخت او کره مالومات رسول د شمشاد رسالت دی، تر اوسه یې سرته رسولی او ادامه ورکوي.»
د شمشاد مینه وال وایي، دغې رسنۍ په کمه موده کې وکولی شول چې په کور دننه او بهر خپله نشراتي ساحه پراخه او کار یې اغېزمن تمام شي.
په وزیرستان کې د پښتونخواعوامي ملي ګوند مشر ایاز وزیر وايي: « له هرڅه وړاندې د شمشاد ټولو همکارانو ته د کالیزې مبارکي ورکوم. شمشاد د پښتنو یو مضبوط آواز دی؛ که څه هم د پښتنو په نوم چینلونه زیات دي، خو شمشاد چې د پښتنو کومه نمایندګي کوي، بل چینل نه ده کړې. د پښتنو په نوم ډېر جوړ شوي چینلونه د پنجاب او پاکستانیو ادارو تر کنټرول لاندې دي، مګر شمشاد هغه یوازینۍ رسنۍ ده چې د پښتنو نمایندګي یې ډېره په نره کړې. موږ که په دې سیمه کې څه اسانتیاوې شته، د شمشاد په برکت دي؛ ځکه چې دوی هرځای ته ځان رسولی او د پښتنو هره ستونزه یې خپله ستونزه ګڼلې. موږ په ډاډ سره ویلی شو چې ترڅو شمشاد ژوندی وي، د پښتون غږ به هم ژوندی وي.»
د شمشاد راډیو ټلویزیون خبریالان او کارکوونکي په مسلکي ډول، بې طرفي، د ملي او دیني ارزښتونو پالل، مسلک ته ژمنتیا او پېښو ته پر وخت رسېدنه خپله وجیبه بولي.
شمشاد دغه مزل په داسې حال کې نمانځي چې په تېرو دوو لسیزو کې د اطلاع رسونې په برخه کې ستړې ګاللې او لا هم خپل رسالت ته ادامه ورکوي.
