د ترکیې په پلازمېنه انقره کې د افغانستان سفارت د يوې خبرتيا په خپرولو سره ویلي، د ترکیي چارواکو د پرېکړې پر بنسټ یې خپل فعالیت بند کړی دی.
په ترکيه کې د افغانستان سفارت د دې پرېکړې لامل د سفارت پر ډېپلوماټانو او مامورینو پرله پسې فشارونه ښودلي او څرګندوي چې د سفارت ودانې يې د اسلامي امارت د استازي پر ځای د ترکیې بهرنیو چارو وزارت ته سپارلې ده.
ترکیه کې د افغانستان سفارت په دې اړه ویلي: « د ۲۰۲۱ د اګست له ۱۵ راوروسته، د سفارت د کنټرول ترلاسه کولو لپاره د اسلامي امارت هڅو، د سفارت پر ډېپلوماټانو او مامورانو باندې د دوامداره فشارونو او دغه راز د ترکیې پر حکومت باندې له فشارونو وروسته، د کوربه هېواد د بهرنیو چارو وزارت پرېکړه وکړه چې د جمهوریت د سفیر او د سفارت د ډېپلوماټانو ماموریت ختم کړي.»
د ترکیې بهرنیو چارو وزارت ته په انقره کې د افغانستان سفارت له سپارلو سره سم، د اسلامي امارت د بهرنیو چارو وزارت درېیم سیاسي رییس ذاکر جلالي د هېوادونو په ډېپلوماټیکو استازولیو کې د کارکونکو او ډېپلوماټانو بدلون عادي کړنه بولي او په خبره يې، په انقره کې د افغانستان سفارت به د تېر په څېر خپل فعاليت ته دوام ورکوي او د نویو ډېپلوماټانو له لورې به يې چارې پرمخ وړل کيږي.
جلالي زیاته کړې: « د ترکيې په پلازمېنه انقره کې د افغانستان سفارت د معمول په څېر خپل فعاليت ته دوام ورکوي او د خپلو هېوادوالو او نورو مراجعينو په خدمت کې دی. هېوادوال بايد ډاډه اوسي چې په سفارت کې د اسلامي امارت د ډېپلوماټانو له لورې په بشپړ شفافيت، مسووليت او تعهد سره د کونسلي خدماتو او د هېواد د استازيتوب دندې ترسره کېږي. د هېوادونو په ډېپلوماټيکو استازوليو کې د ډېپلوماټيک کادر ادلون بدلون عادي خبره ده.»
دې ته په پام سره، د نړیوالو اړیکو کارپوهان په دې نظر دي چې سرپرست حکومت دې له ترکیې سره خپلې ډېپلوماټیکي اړیکي پیاوړې کړي او دغه هېواد ته دې قناعت ورکړي چې سفارت اسلامي امارت ته وسپاري.
د نړیوالو اړیکو کارپوه دوکتور سمیر انګار وايي: « اسلامي امارت باید ترکیې سره خپلو ډېپلوماټیک روابط قوي کړي، د سفارت د بندېدو لاملونه روښانه کړي او د نړیوال مشروعیت لپاره د منلو وړ پالیسي غوره کړي.»
له دې ور اخوا، پاکستان، چین او روسیه په هغو هېوادونو کې شامل دي چې د اسلامي امارت ډېپلوماټان یې منلي دي، خو په ترکیه کې د تېر جمهوري نظام د ډېپلوماټانو ماموریت پای ته رسېدل او کوربه هېواد ته د سفارت سپارلو په اړه د شنونکو نظرونه وېشلي دي.
د سیاسي چارو کارپوه توریالی ځاځی وايي: « اوس باید د هغو تجربو پر بنسټ چې په تېرو څو لسیزو کې ترلاسه شوې، اسلامي امارت پرته له دې چې له نورې نړۍ سره تعامل وکړي او د نړیوالو عمده غوښتنې چې لومړۍ یې د نجونو د ښوونځیو پرانستل دي ونه مني، د سفارتونو ترلاسه کول به یوه لویه ستونزه وي. دوی باید داسې څه وکړي چې هم یې نړیوال غواړي او هم یې ولس وغواړي.»
دا په داسې حال کې ده چې په افغانستان د اسلامي امارت له بیا واکمنېدو وروسته، په ترکیې کې د افغانستان سفارت چارې د پخواني حکومت ډېپلوماټانو پرمخ وړلې، خو اوس به وليدل شي چې له دې دغې پريکړې وروسته کوبه هېواد کله په رسمي ډول افغان سفارت د اسلامي امارت له لوري معرفي شویو ډېپلوماټانو ته سپاري.
