د سره صلیب نړيوالې کمېټې (آی.سي.آر.سي) هغه راپورونه رد کړل چې وايي، دغې کمېټې خپلو کارکوونکو ته د امنيتي ستونزو له امله په کور د پاتې کېدو لارښوونه کړې.
د سره صلیب کمېټې د یوې اعلامیې په خپرولو سره ویلي، اړمنو افغانانو ته د بشري مرستو رسولو لپاره ژمن دي او د کابل په ګډون په ټولو ولايتونو کې يې کارکوونکي له امنيتي ګواښ پرته دندې په عادي ډول مخته وړي.
په افغانستان کې د سره صليب نړيوالې کمېټې وياند پروېز احمد فيضي وايي: « موږ غواړو د یوې رسنۍ له خوا خپاره شوي ناسم راپور ته ځواب ووایو چې ادعا یې کړې چې ګوندې آی.سي.آر.سي په کابل کې خپلو کارمندانو ته د امنیتي دلایلو له امله په کور کې د پاتې کېدو لارښونه کړې. دا راپور په بشپړه توګه ناسم او غلط دی. په کابل او ټول افغانستان کې د آی.سي.آر.سي کارمندان پرته له کوم خنډ او ځنډ خپلو دندو ته دوام ورکوي او زموږ ټول بشردوستانه پروګرامونه د معمول په څېر فعال دي. موږ په ټول هېواد کې اړمنو کسانو ته د بشري مرستو رسولو په برخه کې د پخوا په شان ژمن یو.»
له تېرو درېيو کلونو راهیسې په افغانستان کې د بې کارۍ شمېر کې د پام وړ زیاتوالی راغلی، د اقتصادي بندیزونو او له افغانستانه د پرمختیايي مرستندویه بنسټونو وتلو په ځانګړې توګه د هغو کسانو لپاره کار موندل سخت کړي چې دایمي کار نه لري او ورځنۍ مزدوري کوي.
د اقتصاد وزارت د افغانستان لپاره د سره صلیب بشري مرستې مهمې بولي او له نورو مرستدویه سازمانونو غواړي چې خپلې مرستې له سیاست سره ونه تړي.
د اقتصاد وزارت مسلکي معین عبداللطیف نظري وايي: « په افغانستان کې د سره صلیب کمېټه خپلو ټولو فعالیتونو ته ادامه ورکوي. موږ د کمېټې د فعالیتونو درېدو په اړه هر ډول راپور په کلکه رد کوو. د سره صلیب نړیوالې کمېټې بشردوستانه فعالیتونه لاهم په عادي بڼه ادامه لري.»
د یادې ادارې د مالوماتو پر بنسټ، له معلولینو سره د مصنوعي غړیو د پیوند مرسته، د جګړې له قربانیانو سره روغتیايي مرستې، د خوراکي او غیر خوراکي موادو وېش او په کور دننه له بې ځایه شویو سره مرستې افغانستان کې د دغه سازمان له مهمو فعالیتونو څخه دي.
د سیاسي چارو کارپوهان، د آی.سي.آر.سي فعالیتونه په اوسنیو شرایطو کې مهم ګڼي او ترڅنګ يې ټينګار کوي چې په افغانستان کې د ناسم بشري وضعیت د سمون لپاره بايد پر اوږدمهالو لارو چارو غور وشي.
د سیاسي چارو کارپوه ادریس محمدي ځاځی وايي: « له بلې خوا بیا د دوی پر وړاندې منفي تبلیغات کېږي، هغه داخلي یا خارجي رسنۍ چې په دې کار کې شریکې دي، موخه یې دا ده چې هغه سازمانونه چې د افغانانو لپاره د خیر او ښېګڼې کارونه کوي، مخه یې ونیسي او مشکلات ورته جوړ کړي، ترڅو د پاتې لږو خیریه موسسو فعالیتونه هم ودرېږي.»
د سره صلیب نړیواله کمېټه چې په ۱۸۶۳زېږدیز کال کې په جینوا کې تأسيس شوه، د نړۍ له ۸۰ ډېرو هېوادونو کې فعاليت کوي.
دا کمېټه په جګړه اییزو سیمو کې په بې طرفانه ډول خپل هغه فعالیتونه ترسره کوي چې د ۱۹۴۹زېږدیز کال د جینوا په کنوانسیون کې ورته ځانګړي شوې دي.
