ګډ امنیتي تړون سازمان د دې سازمان غړیو هېوادونو د امنیت په تړاو له افغانستانه د ځینو ګواښونو پر احتمالي خپرېدا اندېښنه ښودلې.
ټاس خبري آژانس د دې سازمان لوی درستیز له قوله لیکلي، په افغانستان کې د ځینو مثبتو بدلونو سره سره لاهم د ترهګرۍ په څېر د یو شمېر ګواښونو د خپرېدو اندېښنه پر خپل ځای ده.
اندرې سردېیوکوف سخت دریځي، ترهګري او د نشه یي توکو قاچاق هغه ګواښونو بللي چې د دې سازمان غړي یې له خپرېدو وېره لري.
سردېیوکوف زیاته کړې:« افغانستان کې د وروستیو مثبتو بدلونونو سربېره د مرکزي آسیا سیمه لاهم بې ثباته ده. د ګډ امنیتي تړون غړي هېوادونه لاهم د سخت دریځې ایډیولوژۍ د خپرېدا، ترهګرۍ او د نشه یي توکو د قاچاق په څېر له ګواښونو سره مخ دي.»
اسلامي امارت د ګډ امنیتي تړون سازمان د دې لوړ پوړي پوځي چارواکي څرګندونو ته په غبرګون کې څه نه دي ویلي؛ خو له دې وړاندې یې له افغانستانه د ترهګرۍ خپرېدا په تړاو د هېوادونو اندېښنې بې ځایه بللې دي.
د سرپرست حکومت چارواکو په ځلونو ویلي چې له ترهګرۍ سره د مبارزې برخه کې جدي دي او نه یوازې دا چې نه پرېږدي په افغانستان کې ترهګریز فعالیتونه ترسره شي؛ بلکې ډاډ ورکوي چې افغان خاوره به د هېڅ هېواد پر وړاندې ونه کارول شي.
د سیاسي چارو شنونکی شهسوار سنګروال وايي: « که موږ تېرو ۲۰ کالو یا تېرو درې لسیزو ته وګورو، دومره چې د نشه يي توکو د کنټرول لپاره اوس کار شوی، زه فکر نه کوم په تېر کې شوی وي. البته شک نه شته چې یو شمېر ستونزې به وي، خو د نشه يي توکو ستونزه تر ډېره حل شوې ده.»
بل پلو، د سیاسي چارو شنونکي له هغو هېوادونو، سیمه ییزو او نړیوالو سازمانونه چې ورته اندېښنې لري، غواړي چې دغه اندېښنې د ترهګرۍ له واقعي ملاتړو هېوادونو سره مطرح کړي.
د پوځي چارو کارپوه اخترمحمد راسخ وايي: « هغه تبلیغات چې د افغانستان د جغرافیا او طالبانو په اړه کېږي، دا کار د غربي نړۍ د استخباراتو له پلان سره سم روان دی. غربي نړۍ غواړي یوځل بیا په افغانستان کې جګړه او بحران رامنځته کړي، ترڅو دوی خپلو نویو پلانونو ته لاره هواره کړي.»
نړۍ او په تېره بیا د سیمې یو شمېر هېوادونو وخت نا وخت له افغانستانه د ترهګرۍ د خپرېدا اندېښنې مطرح کړې دي، خو اسلامي امارت وايي، هېچاته د دې اجازه نه ورکوي چې افغان خاوره د نورو هېوادونو پر وړاندې وکاروي.
