په افغانستان او پاکستان کې د داعش ډلې د حضور په تړاو یو ځل بیا د امریکا استازو جرګې غړیو اندېښنه ښودلې ده.
د دې هېواد د استازو جرګې بهرنیو اړیکو کمېټې پخواني رییس ادعا کړې چې د داعش خراسان څانګه د افغانستان او پاکستان ترمنځ سيمه کې بیا راجوړه شوې او فعالیت یې پيل کړی.
د امریکا استازو جرګې د بهرنیو اړیکو کمېټې پخواني رییس مایکل مککال ویلي: « یوه بله موضوع چې زه ورته ډېر اندېښمن یم، د افغانستان سقوط او هغه فاجعه ده چې هلته پېښه شوه. موږ د داعش خراسان څانګې بیا را ژوندي کېدو ته اندېښمن یو. په هغه سیمه کې چې د افغانستان او پاکستان ترمنځ پرته ده. دا موضوع واقعاً ما ته سخته او د اندېښنې وړ ده.»
د اسلامي امارت ویاند ذبیح الله مجاهد په افغانستان کې د داعش ډلې د فعالیت په تړاو د لویديځو هېوادونو اندېښنې بې بنسټه او تبلیغات ګڼي او له شمشاد سره مرکه کې زیاتوي چې د افغانستان جغرافیه د اسلامي امارت تر واک لاندې ده.
نوموړی زیاتوي، په هېواد کې هېڅ بهرنۍ او کورنۍ خپل سرې ډلې ته د فعالیت اجازه نه ورکول کېږي.
د اسلامي امارت ویاند ذبیح الله مجاهد وايي: « د دوی پټنځایونه ورځ په ورځ پیدا کېږي او له منځه وړل کېږي. موږ اوس هم وایو چې داعش په افغانستان کې پراخ حضور نه لري، نه کومه جغرافیه په لاس کې لري نه هم کومه سیمه او سنګر. دا ډله په متواري شکل باندې یوه فتنه خپروي یا هڅه کوي چې ځینې شریر اقدامات ترسره کړي، هغه هم په داسې ځایونو کې چې امنیت یې له مخکې څخه نه وي نیول شوی. دوی تر ډېره له فرېب او نیرنګ څخه کار اخلي، دا ډله په قوت کې نه ده او نه هم اجازه ورکول کېږي. زموږ امنیتي ځواکونه د ټولو شریرو بانډونو یا د ټولو هغو عناصرو پر واړندې په ډې قاطعیت او جدیت سره مبارزه کوي چې افغانستان ته نا امني راوړي.»
د پوځي او سیاسي چارو کارپوهان بیا په دې باور دي چې داعش ډله په افغانستان کې فزیکي حضور نه لري او ټینګار کوي چې د دې ډلې مرکزونه پاکستان کې موجود دي او په خبره یې که امریکا غواړي افغانستان، سیمه او نړۍ په امن شي، پر اسلام اباد دې فشارونه زیات کړي ترڅو د داعش ډلې له روزنې لاس په سر شي.
د چارو کارپوه توریالی ځاځی وايي: « ټولو ته معلومه ده چې د داعش خراسان ډله په تاجیکستان او پاکستان کې ده. د مایکل مککال نیوکو ته باید زموږ هېوادوال او طالبان د یوه وېښته په اندازه ارزښت ور نه کړي.»
د پوځي چارو کارپوه اسدالله ندیم وايي: « په وروستي پړاو کې هم موږ ولیدل چې په امریکا کې د داعش په نوم یوه کس تروریستي عمل ترسره کړ، دا کس د امریکا تبعه او وګړی و له افغانستان او نورو ځایونو سره یې هېڅ اړیکه نه لرله.»
دا په داسې حال کې ده، چې تر دې وړاندې د بهرنیو چارو وزارت سرپرست امیرخان متقي په کابل کې د یوې غونډې پرمهال له دې پرته چې د کوم هېواد نوم واخلي ویلي وو، درې ګاونډي هېوادونه د داعش ملاتړ کوي او دغه راز یې ډاډ ورکړی و چې داعش ته به په افغانستان کې د حضور موقع ورنه کړل شي.
