د یکشنبې په ورځ (د مرغومي پر ۱۶ مه) ناوخته کندهار کې د درې میلیونه امریکايي ډالرو په ارزښت د حیواني دانې د تولید یوه کارخونه پرانیستل شوه.
د کارخونې مسوولین وايي، په دې کارخونه کې به هر یو ساعت کې ۲۵ ټنه حیواني دانه تولیدېږي او د کندهار تر څنګ به نورو ولایتونو ته هم واستول شي.
د دوی په خبره، په یاده کارخونه کې د ۲۰۰ کارکوونکو له خوا د عصري ماشینونو په واسطه پنځه ډوله حیواني دانه تولیدېږي.
د کارخونې مسوول محمد سلیم کریمي وايي: « له دې وړاندې حیواني دانه له پاکستان راتله او ډېر ټیټ کیفیت یې درلود چې له امله یې هېوادوالو ته زیان رسېده. موږ هڅه کوو حیواني دانه پر لوړ کیفیت تولید کړو، ترڅو موږ ته هم ګټه ورسېږي او هېوادوالو ته هم.»
د کارخونې د خرڅلاو مدیر سلطان احمد انصاري وايي: « په دې کارخونه کې پنځه ډول خوراکه تولیدوو چې په کې د کبانو دانه، د غواګانو خوراکه، د غوښنو چرګانو او د هګۍ اچوونکو چرګانو دانې شاملې دي.»
د دې تولیدي کارخونې پرانستغونډې ته خبرو کې د هېواد د کانونو او صنایعو خونې رییس شېربازر کمین زاده وویل، افغانستان د حیواني دانې او چرګ غوښې د تولید په برخه کې پر ځان بسیا شوی او په دې برخه کې د یو میلیارډ ډالرو وارېداتو مخه نیول شوې.
کمین زاده زیاته کړه، هڅه کېږي نور سکټورونه هم پر ځان بسیا شي.
کمین زاده په دې اړه وايي:« افغانستان په دې سکټور کې کاملا ً پر ځان بسیا شوی او له امله یې د یو میلیارد ډالرو په ارزښت واردات کم شوي. د جمهوریت په وخت کې به موږ چرګان، د چرګانو دانه او هګۍ واردول، خو سږ کال به دغه واردات صفر ته ښکته شي. د دې مانا دا ده چې موږ به یو میلیارد ډالره په خپل داخلي مارکېټ او شرکتونو کې د چرګانو غوښه، دانه او هګۍ تولید ولرو.»
ورته مهال، د حیواني دانې د تولید په دې کارخونه کې پر کار بوخت کسان وايي، دا ډول پانګونې په هېواد کې د بیکارۍ کچې په کمولو کې ډېرې مهمې دي او بهر ته د ځوانانو د تګ مخنیوی کولی شي.
د کارخونې کارګر مطیعالله وايي: «داسې پانګونې په هېواد کې د ځوانانو لپاره ډېره ګټه لري، ځکه زموږ اکثریت ځوانان د کار لپاره بهر هېوادونو ته ځي. که زموږ ملي تجاران دغسې پانګونې وکړي، هم زموږ لپاره ویاړ دی او د هېواد اقتصاد به ورسره پرمختګ وکړي.»
د کارخونې یو تن بل کارګر محمد هاشم وايي: « که څوک خپل وطن کې کار ولري، پردي وطن کې څه کوي. خپل هېواد چې هر ډول وي، تر نورو هېوادونو ښه دی.»
کندهار کې د یادې کارخونې ترڅنګ د ۳۰۰ زرو امریکايي ډالرو په لګښت د غوړیو د تولید یوه بله کارخونه هم پرانیستل شوه چې په کې لسګونه کسانو ته د کار زمینه برابره شوې ده.
