په داسې حال کې چې پاکستان له څو لسیزو راهیسې له افغانستان سره دوه مخی سیاست کوي او تل یې د افغان حکومت مخالف جهت نیولی، تازه یې د بهرنیو چارو وزارت ویلي، هېواد یې په ډېپلوماسۍ باور لري او له افغانستان سره نږدې او دوستانه اړیکې غواړي.
خو د پاکستاني سیاستوالو دا خبرې د افغانانو زړه ته نه لوېږي.
د سیاسي چارو کارپوهان وايي، پاکستان تل د افغانستان په تړاو دوه مخی سیاست غوره کړی او د کابل پر وړاندې خپل ستراتیژیک عمق تعقیبوي.
د کارپوهانو په اند، د پاکستاني سیاستوالو په نرمو خبرو او دوستانه وړاندیزونو هېڅ باور په کار نه دی.
د سیاسي چارو شنونکی فیض محمد ځلاند وايي: « پاکستان همېشه د افغانستان په تړاو په خپلو سیاستونو کې منافقانه او دوه رنګه سیاست خپل کړی. دوی تل پر کابل باندې د زور او جبر، دهشت او وحشت له لارې د خپلو پالیسیو او تګلارو د منلو پالیسي لري. دوی افغانستان ته د ستراتیژیک ژورتیا په سترګه ګوري او نه غواړي چې افغانستان یو خپلواک، پر ځان بسیا او سوکاله دولت او ملت و اوسي. له دې امله د پاکستان په ټولو خوږو کې ترخه او زهر موجود وي.»
د سیاسي چارو شنونکی توریالی ځاځی وايي: « پاکستان ماته یو هغه بې موره او بې پلاره هېواد دی چې د پردیو هېوادونو او په ځانګړې توګه انګرېزانو او امریکایانو د ګټو ساتلو لپاره دلته جوړ شوی. دا هېواد لکه هغه ماشوم دی چې د مور او پلار پر دسترخوان لوی نه شي او په پای کې لوی جنایت کار ترې جوړ شي. پنجاب یا پاکستان دغسې یو حیثیت لري.»
ځینې نور بیا له پاکستان سره د ملي ګټو پر بنسټ د سیاست غوره کول ښه لار ګڼي او وايي، د تېرو څلور لسیزو تجربو ښودلې چې پاکستان خپلواک او ځان بسیا افغانستان نه غواړي او تل هڅه کوي چې کابل اسلام اباد ته محتاج وي.
د دوی په باور، د پاکستان په سیاستونو باور په کار نه دی او له دغه ګاونډي سره باید د افغانستان د ملي ګټو پر بنسټ چلن وشي.
د سیاسي چارو شنونکی شهزاده مسعود په دې اړه وايي: « ترکومه ځایه چې تېرې څلور لسیزې د پاکستان په اړه تجربه لرو، پاکستان هېڅکله هم په خپلو پښو ولاړ، قوي او خپلواک افغانستان نه غواړي. دوی تل یو محتاج هغه هم داسې محتاج افغانستان غوښتی چې دوی ته یې لاس اوږد وي. دوی د افغانستان د ثبات لپاره هېڅکله ګامونه نه دي پورته کړي.»
د پاکستان دوستانه وړاندیزونه او پر ډېپلوماسۍ د باور لرلو خبرې داسې مهال دي چې همدا څو ورځې وړاندې ډېورنډ فرضي کرښې ته څېرمه د پاکستان هوايي ځواک د افغانستان پر خاوره بریدونه وکړل او لسګونه عامو وګړو ته یې مرګ ژوبله واړوله.
