د اقتصاد وزارت له نن څخه دوه کاله وړاندې د ډسمبر پر ۲۴مه د یوه مکتوب په صادرولو سره د ملګرو ملتونو اړوند ادارو په ګډون، ټولو نا دولتي ادارو کې د ښځو پر کار بندیر ولګاوه.
د یاد وزارت چارواکو په نادولتي ادارو کې د ښځو پر کار د بندیز لامل د حجاب نه رعایتول یاد کړي و.
له دې پريکړې وروسته، په افغانستان کې یو شمېر فعالو نړيوالو موسسو خپلې چارې وځنډولې.
د سیاسي چارو کارپوهان وايي، سرپرست حکومت دې د خپل نظام د پایښت لپاره هغه څه ومني چې عام افغانان یې غوښتنه لري او له نړۍ سره د تعامل په برخه کې ستونزې هم کمولی شي.
دوی پر ښځو او نجونو د تعلیم او کار بندیزونه او د تعلیم یافته نجونو بې روزګاري په ټولنه کې د اقتصادي ننګونو یوه برخه ګڼي.
د سیاسي چارو کارپوه توریالی ځاځی وايي: « د مېرمنو کار، بندیزونه په دولتي ادارو کې، په انجیوګانو کې او همدارنګه د نجونو د مکتبونو د داروازو بندول، د نجونو د پوهنتونونو دروازو بندول او د طبي نرسېنګ دروازو بندول، دا هغه ضربه ده چې طالبان یې خپله ځانته واردوي.»
پخوانی ډيپلومات عزیز معارج په دې اړه وايي: « که موږ په عامه کچه باندې وګورو، له نړیوالو سره د افغانستان انزوا یا رسمي اړیکې نه درلودل یا هم پر رسمیت نه پېژندل، د راکړې ورکړې نه لرل او دغه راز پراخې اړیکې نه درلودل یا په لویه کچه د مرستو نه کېدل؛ دا په ټوله کې دا دي چې د نړۍ یوازینی شرط د نجونو تعلیم او د ښځو کار او اشتغال دی. دا نه یوازې په دولتي ادارو کې چې دوی شخصي او خصوصي سکټورونه دي، هلته باید کار ته اجازه ورکړل شي بلکې دولتي ادارو کې هم دوی ته هغه خپل مقررات شرعي چې ورته وضع کېږي، د هغو په رعایت سره باید دوی ته دندې ته اجازه ورکړل شي ترڅو دوی هم خپل کار وکړي.»
په ورته مهال، د بشري حقونو فعالانې هم له سرپرست حکومته غواړي چې د افغانستان د تعلیمي او اقتصادي پرمختګ او له نړیوالې انزوا د وتلو لپاره دې د ښځو پرکار او زده کړو محدویتونه لرې کړي.
د بشري حقونو فعاله آصفه ستانکزۍ وايي: « د ښځو پر کار او زده کړو دا ډول محدودیتونه د ټولنې پر اقتصادي، فرهنګي، اجتماعي او سیاسي اړخونو باندې ډېر منفي اغېز لري. اړتیا ده دغه ډول سیاستونه ژر تر ژره د ښځو له حقونو د ملاتړ په موخه اصلاح شي.»
د ښځو او نجونو پرمخ د زده کړو او کار پر بندیز له دوو کالو تېريدو سره لاهم دغه پرېکړه د نړیوالو له غبرګونونو سره مخ ده.
دوه ورځې وړاندې د امریکا د بهرنیو چارو وزیر انټوني بلینکن له سرپرست حکومته وغوښتل چې ژر تر ژره د ښځو او نجونو پر وړاندې وضع شوي بندیزونه او محدودیتونه لرې کړي.
