د کورنیو چارو وزارت د تامیناتو معین عبدالله مختار وایي، په تېرو شلو کالونو کې د ولسونو د هوساینې په موخه ملي پراختیا او انکشاف ته پام نه دی شوی او دلته بهرنیانو د خپلو اهدافو ترلاسه کولو لپاره پروژې پلي کولې.
مختار خوست کې د خبرو پرمهال وویل، په تېرو جګړو کې شاوخوا ا زر ۵۰۰ تاسیسات تخریب او ویجاړ شوي او بیا رغولو ته اړتیا لري.
نوموړی همدا راز ویلي، د اسلامي امارت له راتګ وروسته کورنیو چارو وزارت په ټول هېواد کې ۳۰ تاسیسات جوړ کړي چې له ډلې یې ۲۳ یوازې د ولسوالیو لپاره اداري ودانۍ وې.
مختار زیاته کړې: « پخوا به چې موږ ته سړکونه یا پلچکونه جوړېدل، یوازې هغه یې جوړول چې امریکایانو په کې خپلې موخې لیدلې. زموږ لپاره ملي انکشاف نه دی شوی، زموږ لپاره داسې پراختیايي پروګرام نه دی جوړ شوی چې زموږ راتلونکې په کې نغښتې وي، بلکې یوازې هغه انکشاف شوی چې امریکایانو ورته اړتیا درلود.»
دا په داسې حال کې ده چې د کورنیو چارو وزارت د خوست ولایت قلندر ولسوالۍ لپاره د نوې جوړې شوې ودانۍ پرانستنه وکړه.
د کورنیو چارو وزارت د تعمیراتو رییس شریف الله الهام وايي، په دې ودانۍ شاوخوا ۲۰ میلیونه افغانۍ لګښت راغلی او د ټولو اداري چارو ترسره کولو لپاره اسانتیاوې په کې په پام کې نیول شوې دي.
الهام زیاته کړې: « په دې ودانۍ شاوخوا ۲۰ میلیونه افغانۍ لګښت راغلی او ۲۸ اداري خونې لري. د ولسوالۍ اړوند ټولې ادارې به له دې وروسته په دې ودانۍ کې فعالیت کوي. نور به ولسونو ته ستونزې نه وي او له سرګردانۍ به خلاص شي.»
د ځایي اوسیدونکو په خبره، وړاندې له دې چې ولسوالۍ وداني نه لرله او چارې یې له بل ځای څخه ترسره کېدې، خلک د خپلو حکومتي چارو د خلاصون په برخه کې له ګڼو ستونزو سره مخ و.
د قلندر ولسوالۍ اوسېدونکی حاجي زمری وايي: « موږ له دې وړاندې ډېر مشکلات لرل؛ ځکه چې ولسوالۍ په مرکز کې وه او د خلکو لاسرسی ورته نه کېده. که به هره ستونزه وه، خلکو به خپل منځ کې هواروله او ولسوالۍ ته نه تلل، ځکه مصارف او کرایه یې ډېره وه.»
د قلندر ولسوالۍ یو بل اوسېدونکی محمد یوسف وايي: « دلته اوس هم ستونزې شته، نه کلینیک شته، نه مکاتب او نه سړکونه. زموږ سړکونه دومره خراب دي چې کوچني موټر پرې اصلا ً نه شي تللی.»
د خوست قلندر ولسوالۍ د مخکېني حکومت پرمهال د نا امنیو او جګړو له امله د خوست مرکز ته انتقال شوې وه، د اوږدې مودې لپاره له خپل اصلي ځای لسګونه کیلومټره لرې، د خوست په مرکز کې فعاله او حکومتي چارې یې پرمخ وړلې.
