واک ته د اسلامي امارت له رسېدو کابو درې کاله وروسته که څه هم د نړۍ هېڅ هېواد اوسنی حکومت پر رسمیت نه دی پېژندلی، خو په دې مودې کې له څه باندې ۴۰ هېوادونو سره عادي ډيپلوماټیکې اړیکې لري.
له هېوادونو سره د همدې اړیکو د ټینګښت پر دوام، تازه په بهرنیو چارو وزارت کې یوې باوري سرچینې شمشاد ته ویلي، هند غواړي نوي ډهلي کې د افغانستان سفارت د پرانیستلو له لارې سرپرست حکومت سره خپلې ډیپلوماټیکې اړیکې پيل کړي.
د سرچینې په حواله، هند د روانې نومبر میاشتې په ۱۳مه نېټه په ممبی کې د سرپرست کونسلر په توګه د اکرام الدین کامل له منلو وروسته، دغه ګام له سرپرست حکومت سره د اړیکو د لاپیاوړتیا په موخه ترسره کوي.
د سیاسي چارو شنونکی برنا صالحي وايي: « په دې کې شک نه شته چې هند او اسلامي امارت ترمنځ د اړیکو نیږدوالي په تړاو ډېرې نښې لیدل کېږي. زه فکر کوم ښايي دغه کار د پاکستان او ځینو نورو هېوادونو په مزاق ښه ونه لګېږي.»
که څه هم د بهرنیو چارو وزارت په رسمي توګه په دې اړه څه نه دي ویلي، خو د سیاسي چارو شنونکي له هند سره د افغانستان اړیکې تاریخي او لرغونې ګڼي او په خبره يې، د همدې تېرو نږدې اړیکو پر اساس دغه هېواد د افغان حکومتونو د قوي ملاتړي او نږدې ملګري په توګه راڅرګند شوی.
د دوی په باور، دغه اړیکې که څه هم په تېرو درېیو کلونو کې د وروستیو تحولاتو او بدلونونو ښکار شوې وې، خو په نږدې وخت کې یې بېرته عادي کېدل د دواړو لوریو ترمنځ د اړیکو د یوه نوي باب پیل کېدو لپاره هیله مندي ښيي.
د پوهنتون استاد فیضمحمد ځلاند وايي: « هند په سیمه کې، په آسیا کې او دغه راز په نړیوال سیاست کې ځواکمن رول لري. له افغانستان سره د هند هر ډول سیاسي، ټولنیز او اقتصادي ملاتړ کولی شي د افغانستان اوسنۍ ستونزې او ورپېښ ګواښونه کم کړي. همدارنګه نور هېوادونه هم کولی شي د هند په قدمونو باندې پل کېږدي او له افغانستان سره خپلې اړیکې ورغوي.»
ځینې نور بیا له هند سره د سفارتي چارو بېرته پيلېدل د اوسني حکومت د قوي ډیپلوماسۍ نښه او له سیاسي اړخه د افغانستان د خپلواکۍ او بې طرفۍ د ضمانت په مانا بولي.
د سیاسي چارو شنونکی حکمتالله حکمت وايي: « له هندوستان سره د ښو اړیکو او ډیپلوماټیک تعامل لرل د افغانستان د خپلواکۍ او بېطرفۍ د ضمانت یو عمده عنصر کېدای شي.»
له هند سره د سیاسي او ډیپلوماټیکو اړیکو د غځېدا خبرې داسې مهال مطرح کیږي چې شاوخوا دوه اوونۍ وړاندې د هند د بهرنیو چارو وزارت یوه پلاوي او د پاکستان، ایرن او افغانستان لپاره د دې هېواد ځانګړي استازي جې پي سینګهـ افغانستان ته له رسمي سفر وروسته، د بهرنیو چارو او ملي دفاع وزارتونو له لومړۍ درجې چارواکو سره دوه اړخیزې لیدنې درلودې.
په دې لیدنو کې د اقتصادي او سوداګریزو اړیکو د ودې ترڅنګ، د سیاسي اړیکو پر پیاوړتیا هم خبرې شوې وې.
