د ریاست الوزرا اقتصادي مرستیال ملا عبدالغني برادر اخوند له روسیي پانګوالو سره کتنه کې ډاډ ورکړی چې افغانستان د طبيعي سرچينو له پلوه بډایه هېواد دی او د کورنيو پانګوالو ترڅنګ بهرني پانګوال هم کولی شي په افغانستان کې پانګونه وکړي.
برادر په دې لیدنه کې له روسي پانګوالو سره د اقتصاد، روغتیا او کرنې سکټور کې د روسي پانګوالو پر پانګونې، په يادو سکټورونو کې د شته فرصتونو او پر ګډې همکارۍ خبرې کړې دي.
د اسلامي امارت مرستیال ویاند حمدالله فطرت په دې اړه وايي: « د ریاست الوزرا اقتصادي مرستیال په خپلو خبرو کې وویل، افغانستان دا مهال په مختلفو سکټورونو کې د پانګونې لپاره غوره فرصتونه لري، کورني او بهرني پانګوال کولی شي په یادو برخو کې پانګونه وکړي. ملا برادر زیاته کړه، افغانستان د طبیعي سرچینو له پلوه یو بډایه هېواد دی او د پانګونې لپاره ښه فرصتونه لري.»
له دې سره، روسیي پانګوالو هم د افغانستان په بېلابېلو سکټورونو او په ځانګړي ډول په صنعت، ټرانسپورټ، رېل پټلۍ، روغتیا او کرنې کې پانګونې ته لېوالتیا ښودلې.
د اسلامي امارت مرستیال ویاند حمدالله فطرت په دې اړه وايي: « د ریاست الوزرا اقتصادي مرستیال په خبره، دوی تل له بهرنیو او کورنیو پانګوالو غوښتي چې افغانستان ته راشي او په بېلابېلو برخو کې پانګونه وکړي. ورپسې روسي پانګوالو په افغانستان کې په بېلابېلو او په ځانګړي ډول صنعت، ټرانسپورټ، رېل پټلۍ، روغتیا او کرنې سکټورونو کې پانګونې ته لېوالتیا وښوده او وویل، دوی غواړي په دې برخه کې پانګونه وکړي او له اسلامي امارت سره خپلې تجربې شریکې کړي.»
د اقتصادي چارو کارپوهان په کور دننه او بهر افغانستان ته د پانګونې جلبولو په اړه ناستې مهمې بولي او زياتوي، د پانګونې جلبولو له لارې د بې روزګارۍ او بېوزلۍ لوړ شوی ګراف ټيټېدای شي.
د اقتصادي چارو کارپوه عبدالجبار ساپی وايي: « همدا لیدنې، ملاقاتونه او کنفرانسونه دي چې متقابل لوری یا بهرني پانګه وال په افغانستان کې پانګونې ته هڅوي، ملاتړ یې کېږي او خوندیتوب ګوري او چمتو کېږي چې په افغانستان کې پانګونه وکړي.»
د اقتصادي چارو کارپوه یونس ځدراڼ وايي: « په افغانستان کې د نړۍ له نورو هېوادونو سره اقتصادي قراردادونه، راکړې ورکړې او همدارنګه په افغانستان کې د نورو هېوادونو له خوا د کارخونو جوړول خلکو ته د کار زمینه برابروي او په دې سره زموږ په هېواد کې فقر له منځه ځي.»
په دې وروستیو کې یو شمېر بهر مېشتو افغان پانګوالو هم زړه ښه کړی چې خپلې پانګې افغانستان ته را نتقال کړي؛ خو غوښتنې یې دا دي چې سرپرست حکومت دې افغان پانګوالو ته د پانګونې د زمینې پراخولو ترڅنګ، شته خنډونه هم له منځه یوسي.
