د زندانونو چارو د سمون ادارې د یوې خبرپاڼې په خپرولو، له ایراني پلاوي سره د دې ادارې د رییس او عدلیې وزارت مرستیال د لیدنې خبر ورکړی.
په دې لیدنه کې د يادې ادارې رییس له ایراني پلاوي سره د افغان بندیانو د انتقال پر پروسې خبرې کړې او د دې ترڅنګ يې له ياد پلاوي غوښتې چې د افغان بندیانو د اوسني وضعیت ارزولو لپاره دې د رسنیو او نړیوالو بنسټونو لپاره د نظارت زمینه برابره کړي.
د اسلامي امارت مرستیال ویاند حمدالله فطرت وايي: « د ایران عدلیې وزارت یو پلاوی کابل ته راغلی او د اسلامي امارت له یو شمېر مسوولینو سره به په دواړو هېوادونو کې د زندانیانو پر مسایلو خبرې ولري. دا یو ښه ګام دی چې افغان زندانیان را انتقال شي او د خپل بند پاتې موده دلته هېواد کې تېره کړي.»
ايراني پلاوي ټینګار کړی چې ایران غواړي د شویو هوکړو پر بنسټ د بندیانو د لېږد پروسې ته ادامه ورکړي.
بله خوا، د سیاسي چارو کارپوهان د ايران او افغانستان ترمنځ د زندانيانو تبادله د محاکمو د پرېکړو په اړه د اندېښنو له منځه تلو سبب بولي او په خبره يې، له تبادلې وروسته اړوند زندانيانو سره په خپلو هېوادونو کې د نافذه قوانينو پر بنسټ چلن کېږي.
د سیاسي چارو کارپوه جنت فهيم چکري : « د افغانستان او ایران ترمنځ د بندیانو د تبادلې په اړه باید ووایم چې دا یو ښه او نېک ګام دی او هغه شکونه له منځه وړي چې د ایران یا افغانستان په محاکمو کې د شویو فیصلو په اړه شته دي. ښه دا ده چې د هر هېواد وګړي چې په بل هېواد کې بندیان وي، په خپل هېواد کې محاکمه شي ترڅو د محاکمو د پرېکړو په تړاو شته اغماض له منځه لاړ شي.»
بله خوا، ځينې نور بیا خپلو اړوندو هېوادونو ته د زندانيانو لېږد مثبت ګام بولي، خو له سرپرست حکومته غواړي چې په جبري توګه له ايرانه د افغانانو د اخراج پر سر دې هم بحث او خبرې وکړي.
د سیاسي چارو کارپوه زلمی افغانیار وايي: « دا چې د ایران د عدلیې وزارت او محابسو ادارې ګډ پلاوی افغانستان ته راغلی او د سرپرست حکومت له چارواکو سره یې لیدلي او له خبرو اترو وروسته د ایران له زندانونو د زر تنو افغان بندیانو د انتقال زمینه برابره شوې، دا یو مثبت ګام دی. زه هیله لرم د کډوالۍ او د افغانستان په کورنیو چارو کې د لاسوهنې نه کولو په تړاو هم خبرې وشي ترڅو شته تقابلاتو ته د ملي ګټو پر بنسټ د تعامل له لارې حل لاره پيدا شي نه په حکومتوالۍ کې د ستراتیژيک عمق د پلي کولو په موخه د سیسټماټیکو فشارونو له لارې.»
دغه ليدنې داسې مهال کېږي چې د ايران د بشري حقونو غیر دولتي سازمان موده وړاندې په خپاره کړي راپور کې ویلي، چې ایران د يوه افغان په ګډون ۹ تنه زندانيان اعدام کړي دي.
