د کورنیو چارو وزارت سرپرست په میدان وردګو ولایت کې د پولیسو له ښوونیز او روزنیز مرکز د ۲۶۵ امنیتي ځواکونو په فراغتغونډه کې د خلکو او امنیتي ځواکونو ترمنځ پر ګډې همکارۍ ټینګار کړی.
خلیفه سراج الدین حقاني په دې غونډه کې د اسلامي امارت پر امنیتي ځواکونو غږ کړی چې له اختلافي مسایلو ډډه وکړي او له ولس سره مسلکي چلن یې د دوی وظیفوي او اخلاقي مسوولیت بللی.
حقاني زیاته کړې:« دا ملت پر موږ اعتماد لري او موږ یې پر ملت لرو. موږ او تاسو یو وجود او یو جسد یو. له خلکو سره په ښه چلن او تعامل باندې چې دغه اعتماد څومره قوي کېږي، همدومره امنیت ټینګېږي.»
حقاني دغه راز د خلکو امنیت او ستونزو ته پر وخت رسېدنه د امنیتي ځواکونو مسولیت بللی.
هغه ولس او حکومت نه جلاکېدونکي بللي او د نظام د بقا لپاره یې د خلکو او حکومت ترمنځ پر همکارۍ ټینګار کړی.
حقاني په دې اړه وايي: « دا رعیت دی، ملت دی او حق لري موږ ورته د خدمت زمینه برابره کړو، د کار زمینه ورته برابره کړو، امنیت یې ونیسو، خو دا به هم ورته وایو چې تاسو ډېر احتیاط وکړئ او داسې مه کوئ چې ګټلی نظام مو په لاس درکړی دی خو ته داسې بې پروايي ورسره کوې، خودسرانه عملونه کوې، نا فرمانۍ کوې او له همدې امله ټول هېواد ته او ټول نظام ته ستونزې او تکلیفونه جوړېږي.»
بل پلو، د یاد ښوونیز او رونیز مرکز قواندان وايي، امنیتي ځواکونو ته له دوو میاشتنیو مسلکي او عقیدتي زده کړو او روزنې وروسته، د فراغت سندونه ورکړل شوي.
محمد نسیم سعید دغه مرکز د افغانستان پر کچه لومړنی مزکز یاد کړی چې په خبره یې په یوه وخت کې د لس زره کسانو د روزنې او جذب ظرفیت لري.
سعيد زیاته کړې:« دې مرکز چې له فتحې وروسته په فعالیت پيل کړی، ۸ زره ۱۴۰ تنه یې فارغ کړي. په دې دوره کې ۲۶۳ تنه محصلین فارغ کړل. دا نظام مسلکي کسانو ته ضرورت لري او مسلکي کسان ښه کولی شي د ملت خدمت وکړي، دا که د چیک پاینټونو په برخه کې وي که په مسلکي برخه کې.»
دا داسې مهال ده چې په تېرو درېیو کلونو کې د هېواد له بېلابېلو نظامي ښوونیز مرکزونو د اسلامي امارت زرګونه پولیس او امنیتي سرتېري د مسلکي زده کړو له ورکړې وروسته، فارغ او امنیتي لیکو کې جذب شوې دي.
