چارواکي وايي، دا لومړی ځل دی چې د فراه ولایت له شیخ ابونصر فراهي بندر د افغانستان کرنیز محصولات عراق ته صادرېږي.
دوی زیاتوي، په تېرو دوو اوونیو کې له دې ولایت د ۳۰۰ زرو امریکايي ډالرو په ارزښت تازه بادرنګ عراق ته صادر شوي.
د دوی په خبره، د افغان کروندګرو محصولاتو ته د بازار موندنې په برخه کې هڅو ته ادامه ورکوي.
د فراه والي ویاند عبدالمالک اسامه وايي: « دا لومړۍ ځل دی چې له فراه ولایت د ایران له لارې عراق هېواد ته بادرنګ صادرېږي. په تېرو دوو اوونیو کې د څه باندې ۳۰۰ زرو ډالرو په ارزښت بادرنګ عراق ته صادر شوي دي.»
سوداګر وایي، هره ورځ له اتو تر دوولس موټرو بادرنګ باروي او د رومیانو صادراتو لپاره هم هڅې رواني دي.
د عبدالله په نوم یوتن سوداګر وايي: « زه ډېر خوشاله یم چې زموږ صادرات د ایران له لارې عراق ته ځي. دا زموږ او د فراه د ولس لپاره یوه غټه لاسته راوړنه ده. زموږ ستونزه دا ده چې له فراه تر بندر پورې لاره خامه ده او خاورې یې د اجناسو کیفیت ته زیان رسوي.»
په ورته مهال، فراه کې د شنو خونو لرونکي او بزګران عراق ته د بادرنګو له صادرولو هرکلی کوي، خو له فراه ښار تر شیخ ابونصر فراهي بندر پورې د غځېدلې لویې لارې له خراب والي شکایت کوي او وايي، د کرنیزو محصولاتو کیفیت ته زیان رسوي.
دوی له سرپرست حکومته غواړي چې د نورو کرنیزو محصولاتو د پلور لپاره هم زمینه برابره کړي او په دې سره خپلو کروندګرو ملاتړ وکړي.
د شنې خونې لرونکی توریالی وايي: « تر ابونصر فراهي بندر پورې لاره خامه ده او تر هغو چې زموږ مالونه تر بندر پورې رسېږي، د مال کیفیت کمېږي او بیا نه پلورل کېږي. له اسلامي امارت هیله لرو چې دا سړک ژر تر ژره پوخ کړي.»
د شنې خونې کارګر منصور وايي: «ډېر خوښ یم چې زموږ محصولات بهرنیو هېوادونو ته ځي او موږ ته هم دلته د کار زمینه برابره شوې ده.»
د فراه کرنې، اوبو لګولو او مالدارۍ ریاست چارواکو د مالوماتو له مخې، اوس مهال په دغه ولایت کې له ۱۰ زره هکټارو ډېره ځمکه باندې شنې خونې او ګلخانې جوړې دي.
