اسلامي امارت د بنسټیزو تولیدي پروژو د تطبیق په لړ کې یو بل ستر اقتصادي ګام پورته کړ. د دې ګام په لړ کې به د جوزجان ولایت په یتیم تاق سیمه کې د سیمنټو د استخراج او تولید یوه لویه کارخونه جوړه شي.
د کانونو او پټرولیم وزارت په همدې موخه د ۷۷ په نوم ترکي شرکت سره د ۱۶۳ میلیونو ډالرو په ارزښت تړون لاسلیک کړ چې موده یې ۳۰ کاله ښودل شوې ده.
د دغه تړون له مخې به ۷۷ ترکي شرکت د جوزجان ولایت یتیم تاق سیمنټو پروژې د استخراج او پروسېس لپاره له اکتشافي او استخراجي پړاوونو وروسته، د سیمنټو کارخونه جوړه کړي.
د کانونو او پټرولیم وزارت سرپرست هدایتالله بدري وايي: « له ۷۷ ترکي شرکت سره د جوزجان ولایت د یتیم تاق د سیمنټو پروژې قرارداد د ۳۰ کلونو لپاره لاسلیکوو. نوموړی شرکت په یاده پروژه کې له خپلو ژمنو سره سم، د اکتشاف، استخراج، ګټې اخیستنې او ټولنیزو خدماتو په برخه کې شاوخوا ۱۶۳ میلیونه امریکايي ډالره پانګونه کوي.»
د کانونو او پټرولیم وزارت سرپرست وايي، د سیمنټو د دغې پروژې چارو له پیل سره به لومړیو کې لسګونه کسانو ته او بیا د تولید او ګټې اخیستنې پرمهال په مستقیم ډول ۱ زر او ۲۰۰ کسانو ته د کار زمینه برابره شي.
هدایت الله بدري وايي، د سیمنټو دغه کارخونه به د ورځې تر ۳ زرو ټنو د سیمنټو د تولید ظرفیت ولري.
بدري زیاتوي: « نوموړی شرکت به د اکتشاف په مرحله کې ۵۰ تنو ته او د ګټې اخیستنې په مرحله کې ۱ زر ۲۰۰ تنو ته په مستقیم ډول د کار زمینه برابروي. همداراز، دغه کارخونه به په ورځني ډول د ۳ زرو ټنو سیمنټو د تولید ظرفیت ولري.»
د ۷۷ ترکي شرکت مسوولین وايي، هڅه به وکړي د افغانستان لپاره په لوړکیفیت سیمنټ تولید او د سیمنټو په برخه کې د افغانستان اړتیا پوره کړي.
د ۷۷ ترکي شرکت مسوول سلېمان جیلیو وايي: « په لومړي سر کې به موږ د صنعتي پانګونې له لارې د یتیم تکریجن په نوم د سيمنټو د تولید یوه کارخونه جوړه کړو چې د ۳ زرو ټنو سیمنټو د تولید ظرفیت به ولري او په لوړکیفیت به افغانانو ته سیمنټ تولید کړي. زه باوري یم چې په راتلونکي کې به د افغانستان د ودې لپاره موږ ډېرو سیمنټوته اړتیا ولرو او موږ چمتوو یوو چې دغه څه عملي کړو.»
په کابل کې د ترکیې سفیر بیا دغه پروژه مهمه ګڼي او زیاتوي، خوښ دی چې ترکي سوداګر په افغانستان کې پانګونې لپاره لېوالتیا لري.
جنګ اونال وايي، داسې بنسټیزې اقتصادي پروژې د افغانانو د اقتصادي ژوند لپاره ارزښتناکې او مهمې دي.
اونال په دې اړه وايي: « موږ دغه پروژې په زیاتې خوښۍ سره تعقیبوو؛ ځکه دا داسې پروژې دي چې د افغانانو ژوند په ښه کېدو کې ډېر ارزښت لري او مهم رول لوبوي.»
دا په داسې حال کې ده چې سرپرست حکومت له دې وړاندې هم د سیمنټو په برخه کې د ځان بسیاینې په موخه د کانونو او پټرولیم وزارت د ۴۷۴ میلیونو ډالرو په ارزښت د کندهار، جبل سراج او هرات د سیمنټو د تولید پروژو هوکړې له یوشمیر کورنیو او بهرنیو شرکتونو سره لاسلیک کړې دي.
