په داسې حال کې چې په هېواد کې ژمی په رانږدې کېدو دی او خلک د دې موسم لپاره اړین سون توکي اخلي، خو کابل ښاریان د سون توکو بیو له لوړوالي شکایت کوي.
د کابل ښار یو تن اوسېدونکی حفیظ الله وايي: « په بیو کې د ډېرو دلایلو له امله توپير راغلی، ځکه بندیزونه راغلي، په ځانګړي ډول د سون توکو په اړه؛ له دې سره زیاته قېمتي راغلې او خلک له ستونزو سره مخامخ دي.»
د کابل اوسېدونکي تېر کال ته په کتو روان کال د سون توکو بیې څو برابره لوړې بولي او له اړوندو ادارو غواړي چې د يادو توکو د بيو کنټرولولو لپاره جدي ګامونه پورته کړي.
د کابل ښار اوسېدونکی غازي حیران ځاځی وايي: « د تېر کال پرتله قېمتونه لوړ دي. دلته له دوکاندارانو موږ پوښتنه کوو چې ولې؟ هغوی وايي چې لارې بندې دي. نه پوهېږو چې ستونزه دولت کې ده، که دوکاندارانو کې. د بورې ارې بیهتېر کال ۷ زره ۲۰۰ افغانۍ وه، خو اوس ۹ زره ۳۰۰ افغانۍ ده.»
بله خوا، د سون توکو پلورونکي وايي، سږ کال له نورو ولایتونو کابل ته د لرګيو پرانتقال بنديز لګول شوی او له همدې کبله د لرګيو او په ټوله کې د سون توکو بيې لوړې شوې دي.
د لرګیو پلورنکی بختیار ځاځي وايي: « لرګي ځکه ګران شوي چې طالبانو بند کړي او دا کوم چې راځي هغه هم قاچاق راځي او له همدې امله ګران دي. موټروانان یې نه راوړي او چې بیا یې راوړي، کرایه یې لوړه وي او لرګي هم نه پيدا کېږي.»
کابل ښار کې د لرګیو یو تن بل پلرونکی مومین وايي: « اوس دا ټول د جلال آباد لرګی دی، خراب لرګی دی او ښه لرګی نه دی. خروار یې ۶ زره، ۶ نیم زره او ۷ زره افغانۍ ده او ښه لرګی نه د ی. هیله دا ده چې لارې خوشې کړي، وچ لرګی راپرېږدي چې ارزانه شي. اوس بلوط لرګی خروار په ۱۳ تر ۱۴ زره افغانۍ ده. د خلکو اقتصاد خراب دی او نه شي کولی چې ښه لرګی واخلي.»
تېر کال حکومت د ژمي په راتګ سره د کابل په یو شمېر سیمو کې د سون توکو د خرڅلاو لپاره ځانګړې سیمې او ثابت نرخونه ټاکلي وو، خو د کابل ښاروالۍ مسوولین وايي، سږکال د يادو توکو د بيو کنټرولولو لپاره ورته لارښوونه نه ده شوې.
د کابل ښاروالۍ استازی نعمتالله بارکزی په دې اړه وايي: « تر اوسه کوم پلان نه شته، موږ هدایت ته منتظر یو. تېر کال هم موږ ته هدایت راغی او وړم کال هم. تر اوسه په دې اړ کوم نوی هدایت نه دی شوی چې زه یې تاسو ته ووایم.»
د مالوماتو له مخې، تېر کال په پلازمېنه کابل کې د يو ټن لرګیو بیه شاوخوا ۸ زره افغانۍ وه، خو سږکال دغه بیه شاوخوا ۱۳ زره افغانیو ته لوړه شوې ده.
